DILI, 13 Outobru 2025 (TATOLI)—Sekretária Estadu Formasaun Profisionál no Empregu (SEFOPE) liuhusi Diretór Jerál Direasaun Nasionál Empregu Estranjeiru, João Correia, hateten daudaun ne’e sira sei halo koodenasaun ho adidu no mós embaixadór Korea iha Timor-Leste hodi trata prosesu transaladasaun mate-isin Domingos da Costa Nunes ne’ebé foin dadauk mate iha tasi Kore mai Timor-Leste.
Notísia Relevante: Traballadór timoroan ida mate iha tasi Korea
Traballadór timoroan ne’e mate tanba mout iha tasi Korea Súl Geyado durante loron tolu hahú iha loron 10 fulan-Outobru, maibe daudaun ne’e ninia empregadór (patraun) ho traballadór timoroan ida mak hetan Domingos da Costa Nunes nia mate-isin hodi entrega ba parte seguransa.
“Ita sei kordena ho embaixadór no adidu iha Korea oinsá atu trata prosesu mate-isin matebian Domingos da Costa Nunes mai Timor. Daudaun ne’e, mate-isin ekipa seguransa lori ona ba ospitál,” Diretór Jerál ne’e informa ba Agênsia Tatoli liuhusi telefónika, ohin.
Nia dehan, labele garante dehan kle’ur ga lalais depende ba prosesu administrasaun ema-nian tamba nasaun hotu-hotu iha ninia prosesu no regra rasik.
“Ita bele hein de’it. Sira mós informa ona ba família matebian traballadór nian iha Timor,” nia hateten.
Traballadór timoroan iha Korea, Marco da Silva, hateten durante loron tolu parte seguransa sira buka maibé lahetan, nune’e kolega ne’e ninia patraun hamutuk ho traballadór timoroan ida mak ohin buka hetan hodi entrega ba seguransa sira no agradese tanba ohin loron foin mak hetan ninia paradeiru.
“Parese nia mout liu ba tasi okos, tanba tasi iha Korea lahanesan ho Timor nian ne’ebé iha tasi okos nakonu ho ahu-ruin, maibé iha Geyado ne’e tasi okos nakonu fali ho taho,” traballadór ne’e esplika.
Tamba ne’e, nia dehan bainhira ita monu ba tasi okos ne’e ema buka ita lahetan tanba ita labele nani sa’e enkuantu ain belit ona ho tahu.
“Ami servisu hotu iha área peska nian kona-ba KIM (panen rumput laut), no servisu iha tempu kalan de’it tamba loron tenke lori produtu ne’e ba faan iha merkadu. Faan depende ba tonelada dalaruma bele hetan to’o atus $1-resin. Ami servisu iha tasi to’o fulan-Abríl 2026, maibé iha fulan-Maiu to’o de’it Agostu sira hahú servisu fali iha rai maran,” nia dehan.
Jornalista : Alexandra da Costa
Editór : Cancio Ximenes
