Adérito Hugo preokupa Estadu ladun valoriza jornalista timoroan kontribui ba independénsia
BOBONARO, 14 Outubru 2025 (TATOLI)–Vise-Ministru Asuntu Parlamentár (VMAP), Adérito Hugo da Costa, preokupa ho Estadu liuliu Palásiu Prezidensiál ladun valoriza no rekoñese jornalista timoron hirak ne’ebé kontribui maka’as ba luta independensia Timor-Leste nian.
Notísia Relevante: Balibo Five, “Tim Susi” sunu jornalista na’in-lima to’o mutuk
“Ita-ne’e dalabarak fó liu kondekorasaun ba jornalista internasionál sira-ne’ebé mai kobertura tinan ida (1) de’it. Ita haree liu ba jornalista estranjeiru sira kulit mutin ne’e. Gabinete iha Aitarak Laran ne’e nunka tau atensaun ba jornalista timoroan sira feto no mane iha tempu rezistensia fó kontribuisaun maka’as ba Timor-Leste nia ukun rasik an, ida-ne’e laiha liu ne’e,” Vise-Ministru ne’e hateten liuhusi programa Meat the Press ne’ebé realiza iha Postu Administrativu Balibo hodi selebra trajedia Balibo Five ba da-50, tersa ne’e.
Nia dehan, kritika ne’e la’ós bandu atu konsidera jornalista internasional sira-nia luta no kontribuisaun, maibé valorize mós jornalista timoroan sira.
“Ita la’ós dehan labele valorize sira maibé teke haree mós jornalista timoroan sira hanesan José Belo, jornalista simplis ida-ne’ebé daudaun ne’e servisu iha Ministériu Negósiu Estranjeiru no Kooperasaun (MNEK) nia naran ha’u haluha ona, ida mós mak Marcelino Magno husi Tempo, no lubuk ida tan. Jornalista estranjeiru, hanesan Max Stahl ne’e ha’u foti xapeo ba nia, tanba ha’u mós hola parte hotu ba masakre 12 de Novembru, maibé ha’u hasai mós Xapeo ba Estadu ida-ne’e bainhira valoriza jornalista timoroan sira-ne’ebé kontribui maka’as ba ita nia rezisténsia ne’e,” nia dehan.
Nia hatutan, pensamentu valoriza ema estranjeiru hodi haluha timoroan rasik ne’e la justu no labele akontese tan.
“Ita-nia pensamentu só haree ema li’ur de’it ne’e la di’ak, tenke haree hetan mós ita-nia maluk timoroan sira. Fó netik papel simplis ida, ida-ne’e hodi konsidera mós sira, ida-ne’e Estadu mak fó la’ós Prezidente Repúblika mak fó, Estadu Timor-Leste mak konsidera sira,” nia hateten.
Alende ne’e, nia husu Estadu atu apresia prezensa jornál Suara Timur-Timur (STT) ne’ebé konsege halo kobertura no deskobre masakre lubuk ida iha Timor-Leste.
“Se bele apresia mós Suara Timur-Timur nia prezensa iha tempu ne’ebá, ho sira nia kobertura loke mós masakre lubuk ida, fó sai notisia amu Belo nian iha Natarbora, masakre iha Likisa Gariana. Iha tempu ne’ebá, jornalista sira hetan ameasa, sira haree jornalista ne’ebé kritiku buka dalan atu fó bolsa estudu hodi lori ba eskola tiha iha li’ur. Ate, ha’u mós jornalista iha momentu ne’ebá sira tenta atu fó bolsa estudu mai-ha’u atu sai tiha ba li’ur atu labele fó sai beibeik problema Timor-Leste nian, maibé iha tempu ne’ebá ha’u rezeita,” nia dehan.
Notísia Relevante: CI propoin ba Ramos-Horta kondekora jornalista na’in-lima mate iha Balibo
Jornalista : Hortencio Sanchez
Editór : Cancio Ximenes
