Família husu HNGV atu vítima ne’ebé hetan tiru husi PNTL fila ba uma
DILI, 14 Outubru 2025 (TATOLI)—Médiku Jerál iha Departementu Emerjénsia Hospitál Nasionál Guido Valadares, Nelson Vilar Caldas, hateten membru PNTL tiru nia feen ho kondisaun lanu iha 12 Outubru ne’ebé baixa hela iha ospitál ne’e, família vítima husu pedidu atu alta hodi fila ba uma.
“Vitima ho insial CFB ne’ebé hetan tiru husi membru Polísia Nasionál Timor Leste, hanesan nia laen iha loron 12 madrugda tuku 04h30 madrugada ne’e, ami simu kazu ida inan-feton idade 18 gravida fulan tolu, entaun lori mai husi nia familia entaun ami konsege hamoos nia ain raan no hetan operasaun. Tanba, nia ain ruin boot parte okos nakfera, entaun ami halo kedas intervensaun no ha’u bolu kedas sirurjiaun mai hare’e kedas. Sira dehan ne’e grave, tanba ne’e atu halo operasaun horisehik maibé familia lakohi hodi lori fila ba uma,” Médiku Jerál iha Departementu Emerjénsia Hospitál Nasionál Guido Valadares, Nelson Vilar Calda, hateten.
Mediku ne’e afirma, iha momentu lori vitima mai iha sala emerjénsia konsege barullu uitoan, tanba suspeitu ho kondisaun lanu, ne’ebé la fó espasu ba pesoál saúde sira atu halo atendementu.
“Sala emerjénsia pesoál saúde sira konsege halo nia servisu hodi fó kedas atendementu liuliu kontaktu kedas parte sirurjia hodi haree kedas nia kondisaun. Doutór sirurjia hare’e katak pasiente nia kondisaun tenke halo operasaun urjénsia, maibé familia rezeita no hili sai husi HNGV hodi ba halo tratamentu tradisional iha uma,” nia dehan.
Nia dehan, vitima ne’e isin-rua entaun emerjénsia tenke halo koordenasaun ho radiolojia, atu bele hasai raiu-x no ikus mai bele leno duni, tanba hasai X-Ray ne’e atu haree nia ain ne’e tohar ka kilat-musan sei iha laran ka lae.
Tanba, iha ne’e parte sirurjia sira presiza hare’e ida-ne’e maibé infelizmente depois de aseitasaun hala’o duni X-Ray ba nia ain, horisehik sira parte sirujiaun sira deside atu hala’o operasaun ba nia ain hodi hadi’a nia ain, tanba kilat musan ne’e tama husi ain sai fali husi sorin maibe nia ain ruin boot parte okos mak rahun.
“Sira ba halo tratamentu tradisional ida-ne’e direitu pasiente nian, sira mak hili. Ami-nia parte halo atendementu tuir buat ne’ebé ami tenke halo. Ne’ebé, parte familia nian deside alta ho pedidu bainhira sira mai fali mós ami sei nafatin simu,” nia dehan.
Jornalista : Felicidade Ximenes
Editór : Cancio Ximenes
