Filipina gaña vitória 3-1 hasoru Timor-Leste
DILI, 14 Outubru 2025 (TATOLI)—Ekipa Selesaun Nasionál Futeból Filipina gaña vitória 3-1 bainhira kontra Timor-Leste iha jogu kontinuasaun faze grupu A AFC Asian Cup 2027 ne’ebé hala’o iha Estádiu Clark, Manila, Tersa kalan ne’e.
Iha jogu referidu, Timor-Leste lidera uluk 0-1 iha minutu-45 bainhira jogadór númeru 9 (João Rangel) prodús golu hafoin shoot husi parte karuk fora husi área penalidade.
Elementu Zé Pedro loke esperansa gaña vitória bainhira Gali Cs iha mudansa jogu iha-ne’ebé hatudu kolaborasaun entre jogadór sira liuhosi bola ain bá ain mezmu Filipina inísia uluk ameasa riin baliza liuhosi jogadór Leopold (7) iha minutu rua (2).
Durante parte dahuluk, ekipa rua troka atake ba malu hanesan Filipina iha minutu sanulu (10) liuhosi Kristensen, jogadór Leopold (7) shoot maibé bola sees husi riin baliza, enkuantu Timor-Leste fó ameasa ba guarda rede Filipina liuhosi jogadór Gali Freitas iha minutu 22 no 27 maibé Guarda rede husi Filipina halo salvasaun no antes árbitu lian jogadór Rangel muda tabela skor 0-1.
Notísia relevante: Jogu kontra Filipina determina destinu Timor-Leste iha AFC Asian Cup 2027
Maibé, anin sorte la faz-parte ba Timor-Leste, iha-ne’ebé hafoin tempu intervalu ramata, ekipa Filipina inísia kedas atake iha parte daruak hodi rezulta golu rápida iha minutu 47 liuhosi jogadór Tabinas no Kristensen prodús aumenta golu iha minutu 70 hodi muda tabela skor 2-1.
Mezmu Zé Pedro koko halo mudansa estratéjia hodi substitui jogadór sira hanesan Mouzinho tama no Zenivio Cruz sai iha minutu 62 maibé ekipa Lafaek lakon ritmu jogu bainhira kompara ho parte dahuluk.
Ekipa Asu Fuik husi Filipina serteja gaña pontu tolu hafoin minutu 90 jogadór Gayoso enxe golu hafoin aproveita bola barullu iha área sensitivu hodi rezulta jogu entre nasaun rua ramata ho vitória husi Filipina ho skor 3-1.
Ho rezultadu jogu ne’e, elementu Carles Cuadrat lidera iha pozisaun dahuluk hafoin koleta pontu sanulu (10), rezultadu husi manán tolu (3), impata ida (1), enkuantu Timor-Leste kontinua iha pozisaun datoluk ho pontu tolu (3), rezultadu manán ida (1), derrota tolu (3).
Entretantu, pozisaun daruak okupa husi Tazaskistaun hafoin rekolla pontu sanulu (10), rezultadu manán tolu (3), impata ida (1) no Maldiva obrigadu tenke okupa iha pozisaun dahaat ho pontu 0 hafoin derrota iha jogu haat.
Line up Timor-Leste (4:3:3)
Junildo Castro (12/GK), Ryan Jom (2), Anizo Correia (23), João Soares (5), Nelson Viegas (22), Santiago da Costa (15), Cláudio Araújo (8), Zion Cruz (13), Gustavo (7), Gali Freitas (21), João Rangel (9).
Line up Filipina (4:3:3)
Mendoza (1/GK), Baccay (14), Aguinaldo (12), Tabinas (4), Kempter (20), Reyes (6), Nyholm (5), Schneider (11), Leopold (7), Kristensen (10), Gayoso (9).
Jornalista: Natalino Belo
Editór: Xisto Freitas da Piedade
