Obra PNDS iha Vikeke sei finaliza iha finde Outubru
VIKEKE, 14 Outubru 2025 (TATOLI)—Diretór Servisu Programa Nasionál Dezenvolvimentu Suku (PNDS) Munisípiu Vikeke, Francisco S. Varela informa progresu implementasaun obra PNDS ba tinan 2025 hamutuk 40 ne’ebé daudaun progresu fíziku atinje ona 52,22%.
“Progresu implementasaun projetu PNDS iha Munisípu Vikeke hamutuk 40. Obra ne’e agora la’o hela no ita fiar katak iha finde Outubru tinan ne’e ita bele finaliza ona,” Francisco S. Varela hateten ba TATOLI iha ninia kna’ar fatin, Tersa ne’e.
Notísia relevante: https://tatoli.tl/2025/06/12/falta-foto-autoridade-vikeke-pnds-lansa-fatuk-dahuluk-ba-konstrusaun-esj-paralelu-uagia/
Nia haktuir, husi projetu PNDS totál 40 ne’e maioria implementa iha suku 36 no durasaun obra ne’e labele liu loron 31 Dezembru 2025 (bainhira liu orsamentu automatikamente sei fila bá kofre Estadu).
“Obra hirak-ne’e ami sempre akompaña no monitoriza, maibé ami hasoru dezafiu oinoin. Dezafiu ida mak laiha transporte hodi halo motorizasaun. Enkunatu problema seluk mak kondisaun estrada difikulta ita halo distribuisaun materiál ba fatin implementasaun obra PNDS iha suku hodi aselera servisu. Tanba ne’e mak ita-nia progresu ne’e labele sa’e,” nia hato’o.
Projetu fíziku husi kada postu hanesan Postu Lakluta iha suku haat atinje ona 36%, Postu Ossú 68%, Uatukarbau 31%, Postu Uatulari 46% no Postu Vikeke Vila 85%. Totál iha nivel Munisípiu Vikeke progresu fíziku atinje 52,22%.
Jornalista: Vitorino Lopez da Costa
Editór: Xisto Freitas da Piedade
