PNTL klarifika kona-ba kilat musan iha kontentór
DILI, 14 Outubru 2025 (TATOLI)—Diretór Servisu Investigasaun Kriminál, Superintendente Xefe Polísia João Belo dos Reis hato’o klarifikasaun kona-ba Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál hamutuk no Autoridade Aduaneira/Alfándega nia deskobrimentu kilat musan iha kontentór iha Sábadu (11/10).
“Atu klarifika katak informasaun ohin iha headline news husi mídia balun hasai katak Autoridade Seguransa ekipa konjuta asegura projetíl bidon tolu 36 ne’ebé maka iha laran kilat musan. Tanba ne’e mak ami presiza halo loos katak, la’ós bidon tolu 36, maibé bidon tolu mak iha kilat musan uzadu,” Superintendente Xefe Polísia João Belo hateten ba Jornalista sira liuhusi konferénsia imprensa ne’ebé hala’o iha Komandu Jerál PNTL, Kaikoli, Tersa ne’e.
Nia esplika, kilat musan uzadu ne’e tau iha karon simenti tolu pois tau iha bidon tolu iha kontentór ida nia laran.
“Kilat musan sira ne’e uza tiha ona, la’ós kilat musan foun. Ne’ebé item sira ne’e ita asegura iha ne’ebá, hatama filafali ba kontentór, Polísia mak kaer xave depois dada ona police line,” nia akresenta
Notísia relevante : Komandu PNTL dezarma no suspende membru CSP ne’ebé fasilita kilat ba xineza
Superintendente Xefe Polísia dehan, empreza internasionál ne’ebé importa sasán ne’e durante ne’e halo atividade iha Timor-Leste hodi halibur sasán uzadu hanesan motór nia sasán kleur, sira halo fali empakotamentu hodi esporta bá nasaun seluk nune’e mós iha kazu ida-ne’e empreza hatama imbolku uzadu hodi prodús fali ba buat seluk.
Aleinde ne’e, Polísia halo ona investigasaun ba na’in ba sasán no halibur ona dadus inklui halo tracking ba empreza nia lala’ok.
“Tuir kompañia nia deklarasaun, sasán sira-ne’e tuir manifestu ne’ebé iha katak orijen mai husi Amérika, depois tránzitu mai Singapura depois tama Timor. Sasán sira ne’e atu halo ba metál ka atu cetak fali alat kuningan mas ne’e prosesu investigsaun sei la’o hela,” nia relata.
Diretór Servisu Investigsaun Kriminál hateten katak nia parte sei koodena ho parte PNTL nasionál no parte seguransa internasionál atu halo ezaminasaun ba sasán sira hodi konfirma sasán sira, katak iha kilat musan uzadu no sasán seluk, oinsá mak nia uza no ninian perigozu mak oinsá bele hatene nune’e bele prosesa ba Tribunál.
Prosesu investigasaun ba sasán sira sei la’o hela, tanba sasán sira hanesan ne’e foin dahuluk tama iha Timor-Leste, tanba ne’e Polísia nafatin buka tuir.
“Sasán sira ne’e ita bele hateten la’ós arma ativu, maibé arma uzadu ninian bahan peledak ne’e laiha ona, imbolku uzadu, kilat musan sira ne’ebé fera tiha ona,” nia katak.
Bazeia ba investigasaun ne’ebé Diresaun Servisu Investigsaun Kriminál halo ba na’in ba empreza, identifika katak sira atu prodús fali alat kuningan, maibé Polisía hamutuk ho nia parseiru sira sei kontinua hodi uza sira-nia ekipamentu ka aparelu ne’ebé iha hodi halo ezame, serake matéria sira ne’e iha risku ka oinsá? tanba ne’e sei husu ajuda ba para deskobre nia grau risku iha futuru.
Jornalista : Natalino Costa
Editora : Julia Chatarina
