DILI, 14 Outubru 2025 (TATOLI)—Sekretáriu Estadu Asuntu Toponímia no Organizasaun Urbana, Germano Santa Brites, hateten Sekretaria Estadu Asuntu Toponímia no Organizasaun (SEATOU) seidauk bele sobu restorante Ocean View no restorante COSETTE iha Suku Bebonuk, Postu Administrativu Dom Aleixo, Munisípiu Dili, tanba sei prioriza ba asuntu seluk.
“Restorante Ocean View ne’e, ha’u hein hela sira-nia karta to’o agora seidauk lori mai ha’u. Restorante na’in dehan atu konsulta ho ha’u mak to’o agora seidauk hasoru ha’u. Entaun hodi ida-ne’e ha’u haree tenke sobu,” Germano dehan ba jornalista sira iha resintu F-FDTL, Fatuhada, Dili, Tersa ne’e.
SEATOU dehan, kuandu nia na’in la kontente desizaun ne’e, bele lori bá Tribunál maibé to’o tempu Governu tenke sobu.
Notísia relevante: Munisípiu Dili notifika ona na’in ba restaurante Cosette hodi hamamuk fatin
“Agora ita haree tempu lai tanba servisu la’ós mak ida-ne’e de’it. Iha parte Postu Dom Aleixo ne’e hela mak parte rua ne’e de’it, restorante Ocean View no COSETTE. Depoiz Ocean View ne’e ita haree buka dalan oinsá bele ko’alia didi’ak, karik la kontente, bele lori bá Tribunal,” Germano hatutan.
Nia informa, kona-ba indemnizasaun ne’e rezolvidu no se na’in nafatin hakarak ko’alia lori bá Tribunál depoiz SEATOU tuir ba.
Jornalista: Osória Marques
Editór: Xisto Freitas da Piedade
