Tribunál aplika Aprezentasaun Períodika ba membru PNTL ne’ebé tiru nia kaben
DILI 14 Outubru 2025 (TATOLI)–Tribunál Judisiál Primeira Instánsia Dili (TJPID), Tersa ne’e, liuhusi Juiza Julmiati Freitas hasai despaisu hodi aplika medida koasaun Aprezentasaun Períodika ba membru Polísia Nasionál Timor-Leste (PNTL) ho inisiál JLO, ne’ebé tiru nia kaben iha área Ai-Mutin, Domingu (12/10).
Prosesu Interogatóriu dahuluk ba kazu ne’e, iha sala julgamentu Prokuradór ne’ebé reprezenta husi Adérito Tilman, promove arguidu ho krime ofensa integridade fízika grave ne’ebé previstu no punidu iha artigu 146 husi Kódigu Penál Timor-Leste.
Durante Interogatoriu dahuluk ba arguidu, iha alegsaun Aprezentasaun Períodika, Prokuradór Adérito Tilman, solisita ba Tribunál atu aplika justisa ne’ebé justu ba arguidu.
Notísia relevante : PNTL detein ona membru tiru nia kaben iha Ai-Mutin
Iha alegsaun Defeza ba arguidu JLO, Defensór Públiku Estaquio Guterres husu ba aprezentasaun períodika ho razaun tanba arguidu nia hahalok ne’e lá’os ho intensaun maibé ho deskuidu.
Hafoin rona tiha parte hotu, Juiza Julmiati Freitas hasai despaisu hodi aplika medida koasaun Aprezentasaun Períodika semana-ida dala-ida iha Komandu PNTL.
Tribunál mós husu Ministériu Públiku atu devolve fali arguidu nia arma, ne’ebé molok ne’e Ministériu Públiku foti nu’udar objetu krime hodi nesesita ba investigasaun.
Hafoin interrogatóriu dahuluk, Defeza arguidu Estaquio Guterres hateten, Tribunál hatún despaisu katak, medida kuasaun ne’ebé adekuadu liu maka Aprezentasaun Períodika maka aprezenta-an semana-ida dala-ida, maibé deside atu aprezenta-an iha Komandu Jerál nia fatin.
Iha alegasaun, Ministériu Públiku husu ba Tribunál atu aplika medida kuasaun ne’ebé adekuadu, tanba Ministériu Públiku haree katak nia hanesan membru Polísia ida no segundu aktu ne’ebé nia halo ne’e sei deskonfia hela dehan tiru.
Tanba arguidu rasik informa ba Tribunál katak momentu ne’ebá nia serbisu iha postu Timor Plaza, depois fila tuku 04:00 dadeer sente kole, pistola tau hela iha kabas atu hasai pistola maka diskuidu hakfodak kilat tarutu.
Tanba ne’e, sei deskonfia hela, nune’e Ministériu Públiku presiza halo investigasaun kle’an tan, karik nia maka iha intensaun atu tiru nia ferik oan ou diskuidu maka kilat ne’e tarutu.
Defeza mós aseita desizaun ne’ebé konsta iha nia desizaun katak aplika Aprezentasaun Períodika.
Jornalista : Natalino Costa
Editora : Julia Chatarina
