Ekipa konjunta halo apreensaun ba bebida midar no sigarru ilísitu
DILI, 15 Outubru 2025 (TATOLI)–Ekipa konjunta kompostu husi Diresaun Servisu Investigasaun Krinál Nasionál, Servisu Nasionál Intelejénsia (SNI), J2 no Autoridade Aduaneiru (AA)/Alfándega no Polísia Sientífika Investigsaun Kriminál (PCIC, sigla portugés) inklui Ministériu Públiku, Kuarta ne’e, halo operasaun ba loja sira iha área Delta, nune’e konsege halo apreensaun ba bebida midar no sigarru ilísitu.
Operasaun konjunta ne’e bazeia ba lei númeru 1 no númeru 5 /2025, 30 Jullu husi artigu 29 númru 1, 5, no 78 hodi halo prevensaun ba krime organizadu.
Durante operasaun ne’e, ekipa konsege tama iha loja Naga Emas no deteta iha bebida midar balun hanesan Teh Pucuk kaixa 10, Golda Coffee kaixa 10 inkui Milko kaixa 10.
Empreza distributór distribui loja Naga Emas atu fa’an, maibé empreza ne’e sei tau iha nia armazein no seidauk fa’an iha loja laran tanba manifestu laiha.
Nune’e, ekipa konjunta asegura kedan sasán sira ne’e no tula iha karreta Polísia tanba sasán sira ne’e tama ona ba sasán kontra-bandu.
Notísia relevante : Alfándega entrega bebida kaixa 2.800-resin ba MSSI
Durante ekipa halo operasaun, Loja na’in Naga Emas koopera ho autoridade seguransa hodi asina termu asetasaun ne’ebé autoriza ekipa halo apreensaun ba sasán.
Hafoin ne’e, ekipa la hetan tan objetu balun tan ne’ebé konsideradu hanesan sasán kontra-bandu, nune’e hakat fali bá estabelesimentu komersiál seluk.
Hakat ba fatin seluk, Ekipa konjunta deteta tan sigarru LA Sticker iha kioske ida ne’ebé antes ne’e Autoridade bandu labele fa’an maibé negosiante kontinua fa’an, nune’e ekipa halo apreensaun ba sigarru ne’e.
Iha tempu hanensan, ekipa mós foti hotu Marllboro masu neen inklui mós sigaru exe masu rua iha vidru laran tanba konsidera sigarru sira ne’e nu’udar sasán kontra-bandu tanba importa husi fronteira maibé laiha dokumentu komprovativu.
Negosiante sujere kontrola sasán tama iha fronteira
Negosiante Seberina Nunes Amaral, hanesan na’in ba sigarru, sente triste tanba ekipa mai derrepente foti nia sasán tanba sasán sira importa husi fronteira mai fa’an iha ne’e.
Nia dehan, atu prevene atividade ilegál sira labele tama mai iha Timor-Leste, tenke halo kontrola ho di’ak fronteira.
“Imi tenke fó seguransa másimu iha fronteira ne’ebá, imi labele simu subornu iha ne’ebá, pois mak husik sasán sira ne’e mai tiha iha ne’e mak ita halo apreensaun fali,” Seberina hateten bainhira ekipa halo apreensaun ba nia kioske iha Delta, Kuarta ne’e.
Entratantu tuir observasaunJornalista Ajénsia TATOLI iha terrenu, nota katak ekipa konjunta mós kontinua tama iha uma ida iha Delta, ne’ebé tuir informasaun rai sigarru barak ne’ebé importadu husi fronteira, maibé uma-na’in laiha fatin.
Nune’e, ekipa husu ba ofisiál Ministériu Públiku ne’ebé hola parte iha ekipa konjuta ne’e hodi komunika ba Prokuradór hodi husu autorizasaun halo buska ba uma ne’e.
Jornalista : Natalino Costa
Editora : Julia Chatarina
