DILI, 13 setembru 2024 (TATOLI)–Ministériu Finansa (MF) liuhusi Autoridade Aduaneira (AA)/ Alfándega, sesta ne’e, entrega bebida Cimory Yogurt Drink, hamutuk kaixa 2.800-resin ba Ministériu Solidaridade Sosiál no Inkluzaun (MSSI).
Diretór Nasionál interinu Alfándega, Armindo Santos, hateten, bebida ne’ebé ohin entrega ba MSSI hanesan bebida importadu, maibé hafoin to’o iha destinasaun, tuir lei impostu seletivu aplika bebida sira ne’e $3 pur litru, entaun na’in ba bebida labele selu nune’e entrega ba Estadu.
“Bazeia ba ami-nia dekretu lei númeru 14/2017 ne’e hateten katak bainhira sasán sira ne’ebé ami halo apreensaun la deklara, entaun sasán sira ne’e afavór ona ba Estadu, entaun iha buat tolu mak ami sei halo hanesan leilaun ba públiku hodi hetan osan hatama ba kofre Estadu, halo destroisaun bainhira sasán sira ne’e liu prazu no ita bele halo doasaun ba ema ne’ebé nesesita. Entaun ita lori bebida sira ne’e mai MSSI,” Diretór informa iha salaun MSSI, Caicoli.
Notísia relevante : PN aprova taxa impostu seletivu iha proposta OJE 2024
Produtu hirak ne’e nia data expira ba konsumu to’o dezembru 2024, tanba ne’e Alfándega deside entrega ba MSSI hodi distribui ba ema ne’ebé presiza.
Iha sorin seluk, Diretór Jerál Servisu Protesaun Sosiál MSSI, Florêncio Pina Gonzaga, hateten, atividade ohin hanesan termu entrega produtu balun ne’ebé halai liu ba konsumu bebida nian, ne’ebé Alfándega organiza atu distribui fali ba instituisaun solidaridade sira ne’ebé tau matan ba labarik sira inklui grupu vulnerável sira seluk.
“Kona-ba distribuisaun, ohin ita simu ona hahú ohin ne’e sei distribui kedas ba instituisaun solidaridade nasionál tantu munisípiu sira,” nia tenik.
Jornalista : Arminda Fonseca
Editora : Julia Chatarina
