DILI, 16 Outubru 2025 (TATOLI)–Ajénsia Kooperasaun Internasionál Japaun (JICA), kuarta ne’e, hala’o Aprezentasaun Finál husi membru Voluntáriu Kooperasaun Ultramarinu Japaun (JOCV) na’in-rua (2) iha Timor-Leste no membru JOCV na’in-rua ne’e hato’o sira-nia aprezentasaun ikus iha Timor Plaza, Dili.
Voluntáriu Japaun sira-ne’e halo aprezentasaun finál sira kona-ba atividade sira-ne’ebé sira hala’o iha sira-nia organizasaun. Sira na’in-rua servisu iha Siénsia Saúde iha Universidade Dili (UNDIL) no ida seluk halo nia atividade voluntáriu iha Hospitál Nasionál Guido Valadares (HNGV).
Aprezentadór sira mak hanesan, Chie Orita, empeñadu ijiene Dentál iha universidade Dili (UNDIL) Fakuldade Siénsia Saúde, no Aya Hojo, empeñadu iha Farmásia Hospitál Nasionál Guido Valadares (HNGV).
JOCV, Chie Orita. hateten durante tinan rua voluntáriu iha Timor-Leste, sira na’in-rua enfrenta difikuldade barak emtermu lian diferensa, kultura, maibé iha komunikasaun di’ak ho estudante sira siénsia hotu bele transforma ba sira ho fasil.
“Lori JICA no JOCV nia naran ami agradese ba ema timoroan sira liu-liu estudante UNDIL no pratikante saúde sira-ne’ebé durante ne’e servisu hamutuk ho ami hodi garante kualidade sistema saúde iha Timor-Leste,’’ Chie Orita hateten iha Timor Plaza, ohin.
Durante aprezentasaun, voluntáriu sira-ne’e aprezenta sira-nia atividade ba finál husi sira-nia kna’ar, inklui diskusaun kona-ba dezafiu sira-ne’ebé sira hasoru durante tinan rua iha rai-laran.
Aprezentasaun sira hala’o iha lian Tetun, hodi hatudu korajen no vontade husi voluntáriu Japaun nian atu aprende lian foun no hakuak kultura foun. Informasaun husi aprezentasaun ne’e sei uza husi JICA hodi avalia karik atividade sira husi JOCV kontribui ba objetivu projetu nian.
Iha fatin hanesan, Reprezentante Xefe JICA iha Timor-Leste, KUWAE Naoto, hateten membru JOCV na’in-rua ne’e kompleta ona sira-nia atividade voluntáriu durante tinan rua iha Timor-Leste, tanba ne’e, membru JOCV sira aprezenta hela sira-nia aprezentasaun finál hanesan parte ida husi prosesu avaliasaun hodi hadi’a programa JOCV sira iha futuru.
“Programa ne’e sei kontinua tanba ne’e enkoraja voluntáriu sira atu kontinua kontribui ba Timor-Leste nia dezenvolvimentu nasionál iha futuru,” KUWAE Naoto dehan.
JOCV mak programa voluntáriu ida-ne’ebé tuan liu iha mundu no programa ida-ne’e ba sira ne’ebé iha kompromisu maka’as atu utiliza sira-nia abilidade no koñesementu rasik ba ema sira iha nasaun sira-ne’ebé dezenvolve hela, liuhusi hili tipu serbisu nian. JOVC mak sistema Governu nian ida hodi haruka voluntáriu joven Japaun sira ba rai-li’ur ne’ebé mak opera husi Ajénsia Kooperasaun Internasionál Japaun nian (JICA).
Voluntáriu japonés liu na’in-40 maka haruka ona ba Timor-Leste atu serbisu iha organizasaun oioin no kontribui maka’as ba nasaun nia dezenvolvimentu liuliu iha dezenvolvimentu juventude no iha setór edukasaun no saúde.
Ajénsia Kooperasaun Internasionál Japaun (JICA) iha prezensa signifikativa no inisiativa kooperasaun iha Timor-Leste, opera programa Voluntáriu Kooperasaun Ultramarinu Japaun (JOCV), haruka voluntáriu Japaun ba organizasaun oioin iha Timor-Leste, hodi apoia setór sira hanesan dezenvolvimentu juventude, edukasaun no saúde.
JICA nia serbisu aliña ho Timor-Leste nia Planu Estratéjiku Dezenvolvimentu 2030, fó prioridade ba infraestrutura sosioekonómiku, diversifikasaun indústria no prestasaun servisu sosiál.
Jornalista : Felicidade Ximenes
Editór : Cancio Ximenes
