DILI,16 Outubru 2025 (TATOLI)—Defensór Públiku, Cancio Xavier no Ministru Justisa, Sergio Hornay, akompaña husi Primeiru-Ministru (PM), Kay Rala Xanana Gusmão, Kinta ne’e, fó pose ba Adjuntu Defensór Públiku Jerál no Defensór Públiku estájiariu na’in-haat.
PM Xanana iha biban ne’e, husu ba emposadu sira atu defende povu kiik nia direitu bainhira sira husu atu fó asisténsia legál.
“Imi ba defende justisa no defende povu, Advogadu ne’e defende sira ne’ebé iha osan. Sira ne’ebé osan laiha sei bá buka imi. Tanba ne’e, ha’u husu imi tenke defende ho di’ak,” Xanana hato’o bainhira partisipa iha serimónia pose iha salaun auditoria Ministériu Justisa, Kaikoli.
Xefe Governu mós husu bá Defensór Públiku sira atu akompaña kazu ida to’o ninia finalidade no esplika lala’ok justisa ho di’ak ba ema sira ne’ebé Defensór fó asisténsia nune’e sira bele entende justisa ho di’ak hodi labele hamosu konfuzaun.
“Prosesu konstrusaun Estadu la’ós de’it iha Governu nia liman, maibé iha sidadaun hotu nia liman no responsabilidade hodi povu bele sente,” nia akresenta.
Notísia relevante : Rejime Tranzitóriu Rekrutamentu Majistradu no Defensór Públiku aprovadu iha jeneralidade
Biban ne’e, PM Xanana hato’o felisitasaun ba emposadu sira no husu atu presta serbisu ne’ebé di’ak ba povu no nasaun.
“Fó parabéns ba imi la’ós tanba imi sai boot ona, maibé hanesan apresiasaun ba imi-nia esforsu iha forasaun, imi-nia mehi la’ós ba imi-nia an, maibé ba povu,” nia tenik.
Iha fatin hanesan, Defensór Públiku Jerál, Câncio Xavier hateten, ba emposadu sira, atribuisaun responsabilidade ne’ebé lee iha termu pose nu’udár mata-dalan ida hodi hala‘o serbisu nu’udár Defensór Públiku.
“Ita sei halo buat hothotu tuir estatutu Defensór Públiku hodi formasaun ba tempu naruk. Maski hetan dezafiu oioin, maibé ita nafatin la’o hodi fó asisténsia ba povu,” katak.
Nune’e mós, Adujunta Defensór Públika Jerál, Marcia Maria Filipe Sarmento hateten, nia parte komporometidu atu kolabora ho Defensór Públiku Jerál hodi mellora serbisu ne’ebé di’ak.
“Nu’udar koajuvadór sei rona ho diskute polítika Defensoria Públika hodi promove serbisu Defensór Públiku Jerál tuir misaun no vizaun Defensór Públiku Jerál hodi asegura dezenvolvimentu institusionál nian. Ha’u sei dedika serbisu ne’ebé atribui ona,” nia katak.
Nune’e mós, Defensór Públiku Estájiariu Emilio Fátima Pereira, promete sei presta serbisu ne’ebé di’ak hodi serví de’it ba povu no nasaun.
“Sei halo serbisu la sees husi estatutu no lei Defensór Públiku nian hodi tau interrese no povu ida-ne’e,” nia katak.
Jornalista : Natalino Costa
Editora : Julia Chatarina
