DILI, 15 Outubru 2025 (TATOLI)–Prezidente Repúblika (PR), José Ramos-Horta, Kuartu ne’e, hala’o vizita bá Autoridade Munisípiu Dili (AMD) hodi husu tau prioridade urjentemente ba sanitária públika (toilet publiku) no jardin sira iha kapitál Dili.
“Ha’u hatene katak iha difikultade oinoin no prioridade barak tebes, maibé Governu tenke hatene atu hili prioridade ne’ebé loloos. Ida-ne’ebé mak urjente mak toilet públiku. Iha suku no aldeia sira iha Dili laran tenke iha toilet públiku atu komunidade internasionál no nasionál sira bele asesu bainhira presiza,” PR Ramos-Horta hateten iha Matadouru.
Xefe Estadu konsidera, toilet públiku iha valór sosiál no saúde públika, tanba ne’e kestaun ne’e importante tebes, liuliu ba vizitante sira ne’ebé mai Dili hodi hala’o ezersísiu iha espasu públiku.
PR Ramos-Horta tau mós importánsia ba dezenvolvimentu jardín sira iha kapitál Dili.
“Ha’u fiar katak fulan hirak mai tan, Dili sei di’ak liután. Maibé ita tenke aselera prosesu diatifikasaun. Jardín sira tenke halo manutensaun, nune’e tenke sai parte planeamentu ne’ebé inklui profisionál sira hanesan jardineiru,” nia akresenta.
Notísia relevante : PAM Dili husu vizitante labele lori tama transporte ba jardín
Xefe Estadu promete atu halo kooperasaun ho entidade relevante sira atubele kontribui toilet ida ka rua ba kada instituisaun.
“Ita sei ko’alia ho setór privadu no embaixada sira atu sira bele oferese kaza-de-bañu públiku ida. Ida-ne’e la’ós karun ka todan maibé prioridade, ha’u koñese ema barak no ha’u sei ko’alia ho sira hodi ajuda pasu ida-ne’e,” nia katak.
Iha fatin hanesan,Presidente Autoridade Munisípiu (PAM) Dili, Francisco dos Santo hateten, vizita no mensajen husi Prezidente Ramos-Horta ne’e hanesan fó inspirasaun boot ida ba autoridade lokál sira.
“Ami sente orgullu tanba vizita espesiál ne’e, tanba fó mensajen klaru katak ami tenke serbisu maka’as hodi bele responde komunidade nia preokupasaun no hadi’a Dili hanesan kapitál ne’ebé bele atrai ema internasionál,” nia katak.
Francisco rekoñese parte jardín sira iha Dili seidauk iha manutensaun di’ak tanba limitasaun orsamentu.
“Jardín sira iha Dili laran laiha manutensaun tanba orsamentu la to’o. Maibé ho esperansa katak Governu Sentrál bele fó suporta atu ami bele responde problema ne’e inklui toilet públiku ne’ebé importante ba turista no komunidade,” PAM Dili hatutan.
Jornalista : Arminda Fonseca
Editora : Julia Chatarina
