DILI, 15 Outubru 2025 (TATOLI)–Prezidente Repúblika (PR), José Ramos-Horta sujere ba Governu liuhusi Ministériu Juventude Desportu Arte no Kultura (MJDAK) no Ministériu Komérsiu Indústria (MKI) kontinua apoiu orsamentu no formasaun ba feto rurál tanba sira mak kontibui maka’as ba ekonomia família.
Xefe Estadu hato’o asuntu ne’e relasiona ho loron internasionál ba feto rurál ne’ebé anualmente komemora iha loron 15 Outubru no loron nasionál kultura iha loron 14 Outubru.
“Loron internasionál ba feto rurál, inan feto sira presiza apoiu liután liuhusi orsamentu no formasaun tanba sira mak kontribui maka’as ho susar ba ekonomia família,” PR Ramos-Horta hateten hafoin vizita ba Autoridade Munisípiu Dili iha Matadouru, Kuarta ne’e.
Notísia relevante : MJDAK-SEAK lansa soru tais liuhusi formasaun ba soru-na’in iha Aileu
Prezidente Repúblika mós husu ba MJDAK no MKI hodi fó apoiu ba feto rurál sira ne’ebé soru tais atu nune’e bele hetan rendimentu. Aleinde ne’e, husu ba inan soru tais sira atu kontinua prodús tais ho kualidade di’ak.
“Iha biban ida-ne’e, ha’u hakarak dehan inan sira ne’ebé prodús tais tenke ho kualidade ne’ebé di’ak maibé labele halo modernu fali tanba tais balun kabas tau hanesan osan mean nian ne’e, la’ós orijinál ona maibé ita tenke tau nafatin importánsia ba orijinál,” nia tenik.
Biban ne’e, Presidente Republika informa ba Governu atu nafatin esforsu buka dalan atu esporta tais ba nasaun seluk, tanba ne’e husu atu soru-na’in sira sira bele mantein ninia orijinál no kualidade.
Jornalista : Arminda Fonseca
Editora : Julia Chatarina
