DILI, 15 Outubru 2025 (TATOLI)—Ekipa Selesaun Nasionál Futeból Timor-Leste laiha ona oportunidade atu partisipa iha AFC Asian Cup 2027 hafoin derrota ho Filipina iha faze kualifikasaun Grupu A.
Derrota dala-rua hasoru Filipina rezulta Timor-Leste labele hakat bá Taxa AFC Asian Cup 2027 tanba bazeia ba kontajen pontu mezmu Gali Cs sei falta jogu rua kontra Tazaskistaun no Maldiva no biar bele manán maibé sei la influénsia ekipa Lafaek iha tabela klasifikasaun tanba Timor-Leste foin rekolla pontu tolu (3) no Maldiva pontu 0. Enkuantu, Filipina no Tazaskistaun rekolla pontu 10 husi jogu haat ne’ebé ekipa sira hala’o durante kontra malu iha faze grupu.
Komentatór Futeból, Joaquim Lopez Vide konsidera maski laiha ona oportunidade más partisipasaun to’o faze kualifikaaaun sai prestasaun pozitiva tanba kompara ho nasaun seluk Timor-Leste foin hahú dezenvolve futeból.
“Ida-ne’e sai lisaun no motivasaun ba ekipa téknika, jogadór no estrutura Federasaun Futeból Timor-Leste nune’e bele hadi’a di’ak liután iha futuru,” Joaquim Vide informa ba TATOLI iha Bairro dos Grilos, Kuarta ne’e.
Timor-Leste rasik partisipa iha kualifikasaun no koloka iha Grupu A hamutuk ho nasaun tolu seluk hafoin liuhosi faze play off kontra Mongolia iha-ne’ebé ekipa Lafaek manán 4-1 iha volta dahuluk no derrota 2-0 iha volta daruak.
Notísia relevante: Filipina gaña vitória 3-1 hasoru Timor-Leste
Nune’e, iha Grupu A ekipa rua hanesan Filipina no Tazaskistaun mak sei iha oportunidade atu hadau tikete ida atu hakat bá AFC Asian Cup hodi kompleta tan ekipa 18 ne’ebé iha ona tikete kompetisaun futeból entre nasaun Ázia.
Nasaun 18 ne’ebé serteja ona atu tuir kompetisaun Taxa AFC Asian Cup 2027 kompostu husi Arábia Saudita (Uma-na’in), Bahrain, Iraun, Irake, Japaun, Jordaun, Oman, Palestina, Qatar, Austrália, Korea Sul, Uniaun Emiradu Arábia, Uzbekistaun, Indonézia, Xina, Kuwait, Kirzikistaun no Korea Norte.
Entertantu, nasaun 24 seluk inkluidu Timor-Leste mak tenke liuhosi faze kualifikasaun ne’ebé fahé ba Grupu A to’o F iha-ne’ebé kada grupu sei iha direitu tikete ida (1) nune’e nasaun neen mak sei kompleta 18 referida husi totál nasaun 24.
Jornalista: Natalino Belo
Editór: Xisto Freitas da Piedade
