DILI, 15 Outubru 2025 (TATOLI)–Tribunál Judisiál Primeira Instánsia Dili (TJPID), Kuarta ne’e, adia desizaun ba Antigu Enkarregadu Negósiu Timor-Leste iha Jenebra, Francisco Deonísio Soares ‘Maukura’, ne’ebé suspeitadu envolve iha krime pekulatu ne’ebé akontese iha tinan 2019.
Iha sala audiénsia julgamentu, Juís prosesu Ivan Suritai deklara katak tuir loloos iha audiénsia julgamentu ne’e, liuhusi juís koletetivu lee sai ona leitura akordaun ba desizaun sira, maibé Tribunál haree katak presiza halo alterasaun jurídika ba kestaun balun tan molok foti desizaun.
Juís Ivan hateten, hafoin Tribunál haree no verifika tiha buat balun, nota katak presiza halo alterasaun no kulifikasaun jurídika, liuliu ba matéria subtansiál no la subtansiál balun tuir artigu artigu 276 no 277 husi Kódigu Prosesu Penál.
Notísia relevante : PR rona preparativu instalasaun Supremu Tribunál Justisa
Ivan haktuir, razaun Tribunál halo alterasaun no kualifikasaun jurídika ba matéria subtansiál no la subtansiál ne’e tanba haree ba orsamentu ne’ebé mak molok ne’e arguidu Francisco devolve ho montante $75.000, ne’ebé konsta iha akuzasaun, diferente ho relatóriu husi Ministériu Negósiu Estrajeiru Kooperasaun, ba osan ne’ebé momentu arguidu devolve filafali ba Estadu.
Tanba ne’e, Tribunál halo alterasaun jurídika ba matéria substansiál no la subtansiál hodi haree filafali orsamentu ne’ebé antes ne’e arguidu devolve ona hira, nune’e Tribunál bele konsta fali iha faze produsanu deprova molok foti desizaun.
Nune’e, Tribunál fó prazu iha loron-15 nia laran hodi nune’e arguidu bele koordena ho ninia Defeza hodi armoniza fali totál orsamentu ne’ebé arguidu devolve ona ba Estadu.
Tanba molok Tribunál atu hasai desizaun ruma, tenke haree ba parte hotu nune’e Maukura labele lakon nia direitu.
Hatan ba kestaun ne’e, Maukura no nia Defensór Públiku, José Guterres aseita sei koordena malu hodi rezolve tiha kestaun sira tuir Tribunál nia orden.
Hafoin Tribunál rona tiha parte hotu, maka adia fali julgamentu ne’e ba loron 11 Novembru 2025 tuku 14:00 hodi lee leitura akordaun ba prosesu ne’e.
Jornalista : Natalino Costa
Editora : Julia Chatarina
