Komisaun Rekrutamentu no ME halo abertura korresaun prova kulturál ba membru PNTL
DILI, 16 Outubru 2025 (TATOLI)–Komisaun Rekrutamentu ba membru Polísia Nasionál Timor-Leste (PNTL) foun hamutuk ho ekipa téknika husi Ministériu Edukasaun (ME), Kinta ne’e, halo abertura korresaun prova kulturál husi aplikante sira ne’ebé partisipa ona prova iha Domingu (12/10).
Prezidente Komisaun Rekrutamentu membru PNTL foun, Komisáriu Pedro Belo hateten, Komisaun hamutuk ho juri, no tékniku sira husi ME ne’ebé hola parte iha rekrutamentu, iha Tersa (14/10) deside katak hahú Kinta ne’e halo abertura ba korresaun prova kulturál.
Nia dehan, Komandante Jerál PNTL Komisáriu Henrique da Costa husu ba Komisaun atu halo serbisu ho neutralidade.“Ita hotu ne’ebé iha juri momós iha Sekretariadu serbisu nafatin ho profisionál no imparsiál, la haree ba sé de’it,” Pedro Belo hateten bainhira halo abertura ba korresaun prova kulturál membru PNTL foun 2025, iha Sentru Formasaun Polísia, Kinta ne’e.
Notísia relevante : Komisaun Rekrutamentu PNTL rejista aplikante na’in-400 hato’o rekursu ba MI
Maski iha rekrutamentu PNTL ne’e fahe ona nia pursentu ba veteranu nia oan 20%, Polísia nia oan 20%, ba feto 20% no jerál 40%, maibé komisaun nafatin halo nia serbisu.
“Ita-nia oan sira mós partisipa iha kandidatu ba Polísia, maibé iha ne’ebá ita nafatin hatudu ita-nia neutralidade no parsiál hodi nune’e bele halo serbisu hotu la’o ho di’ak,” nia akresenta.
Prezidente Komisaun rekoñese, serbisu ida-ne’e ema hotu akompaña, liliu mídia sira ne’ebé durante ne’e tuir prosesu rekrutamentu ne’ebé to’o ona ba prova kulturál, nune’e husu ba Komisaun atu halo knaar ho transparánsia no neutralidade.
Iha biban ne’e, Komisáriu Pedro Belo agradese ba Ministra Edukasaun, Dulce de Jesus Soares ne’ebé koopera tebes ho Ministru Interiór, Francisco da Costa Guterres hodi apoiu PNTL iha rekrutamentu ida-ne’e.
“Ekipa téknika sira husi Ministériu Edukasaun ne’e profisionál, ami mesak de’it karik ne’e susar oituan, ba ajuda ba sira-nia tulun mak ohin ita bele hala’o serbisu ne’ebé ita haree difísil maibé ita bele ultrapasa,” nia katak.
Iha fatin hanesan, Ministra Edukasaun Dulce de Jesus Soares, husu ba Komisaun Rekrutamentu atu halo korresaun ba rezultadu ezame kulturál ho rigór, nune’e rekrutamentu ne’e bele la’o ho susesu.
Governante ne’e agradese mós ba PNTL tanba fó ona apoia ba ME atu haree profesór sira ne’ebé foin lalais halo rekrutamentu hodi halo formasaun karakter iha Rairobo.
“Nune’e ba oin PNTL no Ministériu Edukasaun sei kontinua apoia malu iha serbisu sira ne’ebé konsidera importante,” nia tenik.
Jornalista : Natalino Costa
Editora : Julia Chatarina
