MS simu médiku xineza na’in-12 hala’o servisu atendementu iha HNGV
DILI, 16 Outubru 2025 (TATOLI)—Ministériu Saúde hamutuk ho Hospitál Nasionál Guido Valadares (HNGV), simu mediku xineza na’in-12 hodi kontinua hala’o servisu atendementu ba populasaun Timor Leste.
Médiku xineza ne’ebé durante apoiu servisu iha HNGV durante 2023 to’o 2025 ne’e ninia mandatu ramata ona, no ohin médiku xineza na’in-12 substitui hodi hala’o servisu atendementu iha HNGV hahú husi 2025 to’o 2027.
“Serimónia importante ida-ne’e atu dehan obrigada ba ekipa Médika Xina ne’ebé ramata nia misaun, no iha tempu hanesan atu fila-fali mai ho ekipa foun ne’ebé sei kontinua kooperasaun ne’ebé entre Timor-Leste no Repúblika Populár Xina iha área saúde nian. Ha’u hato’o agradesementu ba ita-boot sira-nia profisionalizmu no dedikasaun, espiritu servisu no kompromisu ho povu timorense. Tempu naruk imi servisu hamutuk ho doutór no enfemeiru Timor-Leste hodi partilka koñesementu no práktika klinika di’ak ne’ebé imi fó hanesan,” Ministra Saúde, Elia dos Reis Amaral, hateten iha HNGV, ohin.
Nia dehan, ba membru foun husi ekipa médiku Xina, Bem-Vindu mai Timor-Leste tanba rai ida-ne’e iha povu ho haksolok, respeitu no espiritu partilla.
“Ita konfia katak imi-nia presenza sei fó hahú forte tan ba kooperasaun ida-ne’e, no ita sei kontinua liu hamutuk atu hadi’a kualidade servisu ospitál, liuliu kuidadu tersiaria, fó formasaun no kapasita profisionál saúde Timor-Leste no garante asesu ba servisu saúde di’ak ba povu Timor-Leste,” nia relata.
Iha fatin hanesan, Embaixadora Xina iha Timor-Leste, Wang Wenli hato’o agradesementu ba Ministériu Saúde no Hospitál Nasionál Guido Valadares ba kontribuisaun no esforsu no apoiu sira ba ekipa médiku xineza sira-nia servisu.
“Tinan rua ne’e servisu no orgullu tebes ho sira-nia servisu no esforsu, no ami hetan buat ne’ebé di’ak tebes. Ita-boot hatene realizasaun no komprimentu ba dezempeñu, agardese ba Ministeriu Saúde ne’ebé fiar ba apoiu no konveniénsia hotu-hotu atu permite ba ami-nia ekipa médiku Xinés, no ba ita-boot nia importánsia ne’ebé ita-boot fó hanesan kooperasaun saúde entre Timor-Leste ho Xina nian,” Wang Wenli hateten.
Diretór Servisu Apoiu Diagnóstiku no Terapêutika HNGV, Vidal Lopes, hateten ohin loron halo serimonia despedida brigada médiku xina hamutuk 12 ne’ebé misaun ramata no 12 ne’ebé mak atu substitui servisu atendimentu iha HNGV.
“Médiku sira-ne’e sira iha área espesialidade sia (9) maibé sira mai ho ekipa, entaun inklui ho tradutór ida, kozineiru ida no enfermeiru ida entaun ida-ne’e mak hamutuk 12. Agora médiku ne’e mak na’in-sia (9) hanesan kardiolojista, intesivisita, ortopedista, anastelojista no seluk tan. Sira-ne’e mak ohin ramata no sira-neebe troka mós nafatin área sira ne’e,” Vidal dehan.
Nia subliña, HNGV kontinua presiza rekursu umanu tanba HNGV kontinua falta rekursu umanu iha área espesializadu.
“Ita agardese ba Governu Xina tanba apoiunia médiku iha tempu naruk ona mais 20 anos, apoiu ida-ne’e la’o to’o agora,” nia hateten.
Jornalista : Felicidade Ximenes
Editór : Cancio Ximenes
