PM Xanana bolu atensaun ba ró sira ne’ebé para iha tasi-laran
DILI, 16 Outubru 2025 (TATOLI)—Primeiru-Ministru (PM), Kay Rala Xanana Gusmão bolu atensaun ba Autoridade Seguransa sira atu tau-matan ba ró sira ne’ebé para iha tasi-laran.
“Ha’u bolu atensaun ba ró metan sira ne’ebé para iha tasi-laran sira ne’e, kalan-kalan ba haree ka hafuhu, keta ró ruma ba hasai sasán karik, tenke haree, tanba problema ida-ne’e mak ita hanoin katak ita tuur de’it labele, ita tenke ezije ba instituisaun Estadu sira ne’ebé kaer seguransa atu redús kriminalidade iha nasionál,” PM Xanana hateten iha Palásiu Prezidensiál, Bairru-Pité, kinta ne’e.
Biban ne’e, nia hato’o apresiasaun ba Polísia Nasionál Timor-Leste (PNTL) liuhusi Diresaun Servisu Investigasaun Kriminál Nasionál hamutuk no Autoridade Aduaneira/Alfándega, nia serbisu ne’ebé deskobre kilat musan iha kontentór laran, iha área Tibar, Sábadu (11/10).
Notísia relevante : PNTL klarifika kona-ba kilat musan iha kontentór
“Ita foku ba seguransa haree di’ak tebes tanba sira deteta hetan kilat musan hasai kedas, ita tenke apresia ba esforsu husi intelijénsia sira hotu,” Xanana dehan.
kilat musan uzadu ne’e tau iha karon simenti tolu pois tau iha bidon tolu iha kontentór ida nia laran.
Bazeia ba investigasaun ne’ebé Diresaun Servisu Investigsaun Kriminál halo ba responsável empreza ne’ebé hanesan na’in ba sasán, identifika katak sira atu prodús fali farramenta lataun (alat kuningan), maibé Polisía hamutuk ho nia parseiru sira sei kontinua uza farramenta ne’e nu’udar aparelu hodi halo ezame, hodi konfirma nia risku iha futuru.
Jornalista : Arminda Fonseca
Editora : Julia Chatarina
