VIKEKE, 16 Outubru 2025 (TATOLI)—Sekretáriu Ezekutivu Programa Dezenvolvimentu Nasionál Suku (PNDS) Nasionál, Amandio Paulino Gastão Sousa, husu autoridade postu administrativu aselera obra konstrusaun fahi luhan ne’ebé konstrui iha Suku Dilór tanba PNDS aloka ona orsamentu ba konta Suku Dilór.
“Ita iha programa pilotu ne’e harii sentru animál haki’ak fahi sai hanesan investimentu ne’ebé finansia husi orsamentu PNDS ne’ebé implementa iha Suku Dilór, Postu Administrativu Lakluta. Orsamentu ba programa referidu ami transfere ona ba konta suku nian. Tanba ne’e, ha’u husu ba xefe suku no administradór Lakluta aselera obra kontrusaun fahi luhan,” Amandio Paulino Gastão ba TATOLI iha Postu Vikeke Vila, Kinta ne’e.
Sekretáriu Ezekutivu PNDS ne’e hatutan depoizde konstrusaun fahi luhan, Xina sei oferese fahi oan hamutuk 12 kompostu husi inan sanulu no aman rua hodi haki’ak.
Kona-ba alokasaun orsamentu ba konstrusaun fahi luhan no preparasaun sira seluk, tuir nia, sei gasta orsamentu $53.400,00 husi Ministériu Administrasaun Estatál (MAE).
Iha fatin ketak, Xefe Suku Dilór, Jacinto Ximenes haktuir, kona-ba preparasaun ba konstrusaun fatin fahi luhan, daudaun ne’e suku prepara ona, hein semana oin hahú loke kuotasaun ba empreza sira hodi fornese materiál fabrikadu no naun fabrikadu hodi halo konstrusaun ba fahi luhan.
“Orsamentu ba programa investimentu haki’ak fahi agora iha ona ami-nia konta suku. Nune’e, ami agora sei iha faze levantamentu hanesan asesibilidade ba estrada, bee-moos, eletrisidade no korridór implementasaun prosesu sira-ne’e. Semana oin ami hahú distribui formatu ba fornesedór sira hodi fornese materiál fabrikadu no naun fabrikadu. Bainhira ida-ne’e hotu ita hahú konstrusaun,” nia hato’o.
Enkuantu, programa investimentu ne’e ho totál membru grupu hamutuk na’in-sanulu ne’ebé mai husi Suku Dilór.
Jornalista: Vitorino Lopes da Costa
Editór: Xisto Freitas da Piedade
