DILI, 17 Outubru 2025 (TATOLI)-Vise-Primeiru Ministru, Ministru Koordenadór Asuntu Sosiál Asuntu Sosiál no Ministru Dezenvolvimentu Rurál no Abitasaun Komunitáriu, Mariano Assanami Sabino, hateten iha proposta Orsamentu Jerál Estadu (OJE) 2026 kontinua prioriza programa abitasaun komunitáriu dignu.
Vise-Primeiru Ministru aprezenta vizaun jerál kona-ba programa referida, husi inisiativa prioridade Ministériu Dezenvolvimentu Rurál no Abitasaun Komunitária nian. Tanba konsta ona iha Konstituisaun Repúblika Demokrátika Timor-Leste katak, uma ne’ebé dignu la’ós deit nesesidade bá ema atu moris, maibé direitu fundamentál ida bá kada sidadaun timoroan.
“Ne’e hatudu katak Governu tenke garante sidadaun hotu-hotu nia direitu atu hetan moris dignu, liuhusi abitasaun ne’ebé seguru, saudável, no fó kondisaun ida ne’ebé estimula dignidade armónia no dezenvolvimentu komunidade nian,” nia hato’o iha intervensaun durante Semináriu panorama orsamentál 2026 ne’ebé organiza husi Parlamentu Nasionál liuhusi Komisaun C ba Finansa Públika iha edifísiu Ministéiru Finansa, Aitarak-Laran ba loron daruak, sesta ne’e.
Nia hateten, programa uma dignu bazeia ba prinsípiu orientador lima; ordenadu, organizadu, urbanizadu, amigável ba ambiente no sustentável.
“Prinsípiu sira-ne’e reflete vizaun dezenvolvimentu abitasaun nian, neʼebé la limita ba harii uma de’it, maibé promove komunidade ne’ebé dignu, integradu no reziliente,” nia dehan.
Hodi salienta, programa nia objetivu prinsipál iha tolu; Dahuluk atu reforsa polítika nasionál ba abitasaun komunitária no halo revizaun ba Polítika Nasionál Abitasaun 2007 hodi adota abordajen ida ne’ebé transformativu.
“Polítika ida ne’ebé hakat liu konstrusaun fíziku, ho objetivu atu muda mentalidade liuhosi kriasaun espasu públiku sira ne’ebé funsionál no inkluzivu.”
Daruak, asegura konstrusaun uma dignu ba família vulnerável sira iha área rurál no peri-urbana.
Datoluk, garante koordenasaun klean ho ministériu relevante sira atu nune’e fasilidade públika no infraestrutura bázika sira aliña ho dezenvolvimentu abitasaun nian.
Assanami, relata durante tinan 2024 rejista progresu kontinuadu. Uma dignu unidade 90 harii iha munisípiu Manatutu, Manufahi, Lautein no Bobonaru, aleinde fatin halimar ba labarik unidade tolu iha Manatutu, Manufahi no Bobonaru no kafetária ida iha Manatutu.
Nia hateten ba tinan 2026 konstrusaun unidade uma tradisionál hamutuk 46 iha Kovalima. No unidade uma dignu hamutuk 52 iha Ainaru, Kovalima no Ermera no fatin halimar ba labarik ida iha Lautein.
No estudu ida ba bairru foun iha Manufahi.
“Importante atu destaka katak, hosi investimentu totál uma dignu unidade 90, maizumenus 35% hosi kustu sira maka fila diretamente ba komunidade lokál,liuhosi sosa materiál no kontrata traballadór lokál sira,” nia katak.
Nune’e, kada dólar ne’ebé investe hamosu benefísiu diretu no benefísiu indiretu multiplika impaktu ekonómiku no sosiál iha aldeia benefisiáriu sira.
Programa uma dignu hatudu katak uma maka instrumentu ida ba dezenvolvimentu, inkluzaun no transformasaun sosiál.
Entretantu, tuir dokumentu livru proposta OJE 2026 iha Fundu Infraestrutura kona-ba dotasaun orsamentál ba programa abitasaun komunitária prevee $ 92.641.
Lembra Governu liuhusi Ministra Finansa, Santina Cardoso, iha loron 01 fulan Outubru ne’e submete ona proposta lei OJE 2026 ho montante billaun $2,291 ba PN.
Notísia relevante: https://tatoli.tl/2025/10/16/mf-aprezenta-vizaun-jeral-oje-2026-iha-seminariu-nasional-orsamental/
Jornalista: Nelson de Sousa
Editór: Evaristo Martins
