BTL, E.P arrekada reseita millaun $1,6 iha trimestre datoluk 2025
DILI, 17 Outubru 2025 (TATOLI)—Bee Timor-Leste, Empreza Públika (BTL,E.P) arrekada ona reseita hamutuk $1.629.824,12 ba kofre Estadu, iha trimestre datoluk tinan ne’e.
“Ita-nia estimativa reseita anuál tinan ne’e hamutuk millaun $2,4, entaun iha trimestre datoluk ita rekolla ona $1.629.824,12 ka to’o ona 68%. Ida-ne’e fiar katak tinan ne’e ami bele rekolla to’o estimativa,” Prezidente Konsellu Ezekutivu BTL,E.P, Gustavo da Cruz informa ba Ajénsia TATOLI iha ninia knaar-fatin, Sesta ne’e.
BTL, E.P hahú estabelese desde tinan 2021 to’o agora, arrekada ona reseita hamutuk $5.135.134,63.
“Reseita ne’ebé ita rekolla pozitivu tebes tanba kada trimeste reseita sa’e hela de’it, mai husi atividade sira hanesan monta kontadór, faan-moos no seluk tan,” nia akresenta.
Notísia relevante : BTL,E.P presiza estudu profunda dada bee husi Railaku tanba iha mudansa estrutura rai
Empreza estatál ne’e iha ona kliente hamutuk 33.139 asesu bee-moos, kompostu husi kliente husi Dili 19.071 no kliente husi munisípiu 11 hamutuk 14.068, no monta ona kontadór hamutuk 1.083.
Ezekusaun Orsamentu Jerál Estadu (OJE) ne’ebé akumula husi orsamentu tranzitóriu ho OJE 2025 hamutuk millaun $40,4, ezekuta ona maizumenus millaun $31,6 ka (78%).
“Ita iha kompromisu millaun $5,9 (14%), katak ezekusaun orsamentu la’o tuir ritmu ne’ebé iha,” nia tenik.
Jornalista : Arminda Fonseca
Editora : Julia Chatarina
