DILI, 17 Outubru 2025 (TATOLI)—Ezisténsia Laboratóriu Nasionál Enjinária Sivíl ne’ebé hola parte ba Ministériu Obra Públika (MOP) hodi halo teste no garante kualidade materiál konstrusaun sira antes implementa ba projetu infraestrutura iha territóriu nasionál.
Xefe Koordenadór Laboratóriu Nasionál Enjinária Sivíl, Jony Rodrigues Varela, hateten ezisténsia laboratóriu nasionál ne’e hahú kedas iha Governu dahuluk nian ka iha tinan 2002 to’o agora, ho nia kna’ar halo teste no garante kualidade materiál konstrusaun sira antes implementa ba projetu infraestrutura iha territóriu nasionál..
Laboratóriu ne’e fahe ba servisu tolu hanesan halo teste ba materiál konstrusaun, norma estandarnizasaun kódigu no ikus liu mak kona-ba peskiza dezenvolvimentu, entaun ida-ne’e mak servisu ne’ebé loro-loron sira halo.
“Prosesu kona-ba teste materiál sira-ne’e ba projetu ne’ebé hola parte ba Governu nian no mós kompañia privada, ne’ebé baibain halo teste ba materiál beton, rai no alkatraun. Entaun, antes kompañia sira atu halo konstrusaun ida, presiza halo teste uluk iha laboratóriu hodi garante kualidade,” Koordenadór Jerál ne’e informa ba Agência Tatoli iha nia knaar fatin, ohin.
Aleinde halo teste materiál, nia hatutan, sira mós halo peskiza ba implementasaun servisu Obra Públika nian kona-ba dezeñu, planeamentu ne’ebé presiza sinkroniza.
“Atividade teste materiál hala’o loro-loron, tanba ne’e ho rekursu umanu na’in-100 resin, dalaruma difikulta ami no seluk tan mak ekipamentu. Maibé, ami nafatin esforsu buka mekanizmu hodi hadi’a laboratóriu id- ne’e avansa ba oin,” nia hateten.
Aleinde ne’e, nia moós halo esplikasaun kona-ba maneira kompañia privadu sira-ne’ebé atu halo edifísiu ida, sira tenke hetan teste ba rai (solo) hodi garante kualidade no seguransa edifísiu nian atu dura to’o tempu naruk.
“Tamba ne’e, kompañia sira tenke halo pedidu mai ami, depois mi-nia ekipa ba rekolla uluk dadus hodi sira lori ba submete iha parte edifikasaun atu hetan lisensiamentu ba konstrusaun. Bainhira ekipa laboratóriu halo teste ba sira-nia materiál ruma tenke selu, hodi hetan sertifikadu ba trata lisensiamentu. Kompañia sira selu bazeia ba item ne’ebé atu halo teste,” nia dehan.
Jornalista : Alexandra da Costa
Editór : Cancio Ximenes
