DILI, 20 Outubru 2025 (TATOLI) – Ministériu Administrasaun Estatál (MAE) iha tinan 2026 kontinua halo preparasaun atualiza bazededadus eleitór, avaliasaun kondisaun mínima, apoiu tékniku ba munisípiu sira hodi simu podér lokál.
Ministru Administrasaun Estatál, Tomás do Rosário Cabral, hateten tinan oin kontinua atividade atualizasaun baze dadus hodi prepara ba eleisaun prezidensiál no podér lokál, avaliasaun kondisaun mínima ba serbisu munisipál sira hodi hetan munisípiu ne’ebé prienxe ona kritéria mínimu bele prepara eleisaun tuir mai.
“No sei kria komisaun ida atu halo avaliasaun kondisaun mínimu, hodi bele pronúnsia antes meiadu 2026 munisípiu sira liu kriteiru ho avaliasaun ne’ebé iha,” nia hato’o iha audiénsia públika hodi aprezenta proposta Orsamentu Jerál Estadu (OJE) 2026 ministériu nian no autoridade munisípiu sira ho Komisaun C Finansa Públika no Komisaun G Asuntu Edukasaun, Juventude, Desportu, Sidadania no Kultura iha Parlamentu Nasionál, segunda ne’e.
Tanba tuir planu munisípiu ne’ebé prepara ona kondisaun mínimu sei hakat ba eleisaun kámara munisipál iha 2027.
Nune’e sei prepara mós regulamentu internu, liuliu dekretu-Governu kona-ba implementasaun prosesu eleitorál.
“Ho baze dadus atualizasaun husi STAE “Sekretariadu Tékniku Administrasaun Eleitorál) halo kumpre lei eleitorál eleisaun munisipál, tanba lei ne’e regula mós deputadu ka asembleia munisipál,” nia salienta.
Nune’e bele pronúnsia ona númeru deputadu ba asembleia munisipál no sei iha regulamentu barak atu aplika prosesu ne’ebé mai.
“Tanba ne’e, tinan ne’e no tinan oin ita-nia kontinuasaun sei nafatin hodi bele iha dadus konkretu,” nia katak.
Polítika podér lokál no desentralizasaun administrative ne’e Governu tenke implementa tanba prevista iha Konstituisaun RDTL artigu 5 (desentralizasaun), artigu 71 (organizasaun administrativa) no artigu 72 (podér lokál).
Husi baze fundamenta hirak-ne’e fó dalan ba Governu no Parlamentu Nasionál aprova ona lei podér lokál no desentralizasaun administrativa, lei eleitorál eleitorál, lei finansa munisipál no lei hirak-ne’e promulgadu husi Prezidente Repúblika no sei iha tán lei komplementár seluk ne’ebé oras Governu dezenvolve hela.
Ajénsia TATOLI prodús ona programa programa Hakbesik ne’ebé lansa husi Ministériu Administrasaun Estatál liuhusi Diretór Jerál Dezentralizasaun Governasaun Lokál, António Augusto Guterres no Sekretáriu Estadu Komunikasaun Sosiál, Expedito Diaz Ximenes, iha loron Segunta, 07 fulan-abríl tinan 2025.
Ho baze hirak-ne’e Ajénsia TATOLI mós durante ne’e fó kontribuisaun liuhusi programa Hakbesik ne’ebé la’o ona durante ne’e no foin lalais realiza iha Pouzada Maubisse, Munisípiu Ainaro, hodi konvida ona Prezidente Repúblika, Jose Ramos-Horta ho tema “Prezidente Ramos-Horta ho Povu”.
Mune’e mós konvida ona Sekretáriu Estadu Komunikasaun Sosiál, Expedito Dias Ximenes, Prezidente Autoridade Munisípiu Ainaro, Manuela Georgina Carmo, Prezidente Autoridade Aileu, João Bosco dos Santos, Prezidente Manufahi, Luís Marçal da Costa Tavares no Prezidente Autoridade Munisípiu Kovalima, Miguel Cardoso, liuhusi programa Talk Show iha Pouzada Maubisse.
Prezidente Repúblika mós husu ba Ajénsia TATOLI atu kontinua programa referida iha munisípiu seluk hodi apoia polítika Estadu nian ne’e.
Notísia relevante: Xefe Estadu apresia TATOLI realiza programa “Prezidente Ramos-Horta ho Povu”
Jornalista: Nelson de Sousa
Editór: Evaristo Soares Martins
