PNDS Nasionál introdús programa ekonomia suinukultura ba autoridade Vikeke
VIKEKE, 17 Outubru 2025 (TATOLI)—Sekretáriu Ezekutivu Programa Dezenvolvimentu Nasionál Suku (PNDS) Nasionál, Amandio Paulino Gastão de Sousa, introdús programa Governu liuhusi Ministériu Administrasaun Estatál (MAE) kona-ba ekonomia suinukultura ne’ebé daudaun ne’e implementa iha munisípiu hitu inklui Munisípiu Vikeke.
“Iha oportunidade ida-ne’e ha’u hakarak fó-hanoin ba autoridade sira no diresaun servisu iha Munisípiu Vikeke katak iha tinan 2025 ne’e ita implementa programa pilotu kona-ba ekonomia suinukutura iha munisípiu hitu kompostu Munisípiu Ainaru, Baukau, Kovalima, Lutein, Manatutu, Manufahi no Vikeke. Husi atividade ida-ne’e ita harii sentru haki’ak animál fahi. Haki’ak fahi ne’e husi Xina. Programa pilotu ne’e iha tinan kotuk ha’u ho PAM Vikeke ami bá ona Xina hodi halo estudu komparativu ida. Entaun agora ita implementa iha ita-nia rai,” Amandio ba TATOLI iha Postu Vikeke Vila, Sesta ne’e.
Amandio aprofunda, programa pilotu ba ekonomia suinukultura hili munisípiu hitu atu bá-oin Timor-Leste bele redús importasaun fahi husi nasaun seluk mai Timor-Leste.
Notísia relevante: PNDS husu autoridade Lakluta aselera konstrusaun fatin fahi luhan
“Programa pilotu ekonomia suinukultura ne’ebé agora ita implementa ne’e orsamentu ba konstrusaun ita aloka ona ba konta suku hitu, hodi implementa konstrusaun no preprasaun ba haki’ak fahi. Nune’e, preparasaun haki’ak ne’e ita sei entrega ba Servisu Agrikultura mak tau-matan fahi oan husi Xina, iha-ne’ebé kada sentru fahi inan sanulu (10) no fahi aman rua. Ba fahi aman rua kada loron ita fó manutolun da’an fuan tolu para produsaun fahi inan hahoris oan 12 to’o 20. Ita kompara fahi Timor nian ne’e hahoris lima ka neen de’it,” nia tenik.
Entretantu, programa pilotu ba ekonomia suinukultura Governu liuhusi MAE aloka orsamentu bá munisípiu hitu ho totál hamutuk $421.880,00 ba preparasaun sentru haki’ak.
Alokasaun orsamentu ba kada munisípiu mak hanesan iha Postu Hatobuiliku, Ainaru Vila, Munisípiu Ainaru ho alokasaun orsamentu $55.000.00, iha Baukau implementa iha Aubaka, Suku Triloka ho totál $49.7600,00, iha Munisípiu Kovalima implementa iha Suku Kamanasa ho totál $54.310,00, iha Munisípiu Lautein implementa iha fatin Rasa ho totál $53.380,00.
Iha Munisípiu Manatutu implementa iha fatin rua hanesan iha Suku Sau ho totál $49.760,00, iha Suku Uma Boko gasta $52.400,00, iha Manufahi implementa iha Klauk ho totál $53.870,00 no iha Munisípiu Vikeke implementa iha Wekfila, Suku Dilór ho orsamentu $53.400,00.
Jornalista: Vitorino Lopes da Costa
Editór: Xisto Freitas da Piedade
