DILI, 20 Outubru 2025 (TATOLI)—Xefe Departamentu Imunizasaun iha Ministériu Saúde, Maria Angelina Pereira, relata bebé hamutuk 944 mak simu ona vasina sarampu no rubella husi fulan Janeiru to’o Setembru 2025.
“Atu hatene kle’an kona-ba kobertura sarampu-rubella tinan ida-ne’e, ami kompara iha tinan kotuk ne’e 80% maibé tinan ida-ne’e foin atinje 72%. Ami iha razaun tanba iha fulan kotuk, vasina sarampu estoke hotu ona, tanba ne’e ami sei to’o de’it númeru ne’e,” Maria Angelina Pereira, hateten ba jornlista sira iha nia kna’ar fatin, Kaikoli, ohin.
Nia akresenta, vasina sarampu-rubéola hotu iha fulan-Marsu, maibé pesoál saúde no Ministériu Saúde servisu maka’as hodi kontaktu Fundu Nasaun Unida ba Labarik (UNICEF) hodi transporta ai-moruk sarampu-rubella ne’e mai.
“Iha fulan Jullu, ami hahú fahe ba bebé sira ho idade fulan neen to’o tinan ida fulan neen,” nia relata.
Xefe Departamentu Imunizasaun ne’e informa, ai-moruk sarampu hotu iha tempu ne’ebá maibé laiha prejuízu tanba profisionál saúde sira sempre fó informasaun ba inan-aman sira kona-ba sarampu, presiza lori oan sira ba sentru saúde hodi halo tratamentu maibé durante falta, labarik sira la hetan problema ruma.
Antes neé, Xefe Departamentu Imunizasaun iha Ministériu Saúde, Maria Angelina Pereira, relata, vasina sarampu no rubella ba bebé ho idade fulan neen no fulan 18 estoke hotu ona.
“Vasina sarampu no rubéola Stok hotu ona iha Díli, maibé disponível nafatin iha munisípiu sira seluk,” nia dehan.
Jornalista : Felicidade Ximenes
Editór : Cancio Ximenes
