DILI, 20 Outubru 2025 (TATOLI)—Sekretária Estadu Formasaun Profisionál no Empregu (SEFOPE) liuhusi Diresaun Nasionál Empregu Estranjeiru (DNEE) anúnsia rezultadu ba kandidatu sira-ne’ebé pasa iha prosesu selesaun dokumentu ba vaga Empregadór Seasonál Rekuñesidu (RSE) Nova Zelandia hamutuk na’in 2.186 ne’ebé kompostu husi mane 1531 no feto 640.
Notísia Relevante: SEFOPE rejista kandidatu vaga online RSE bá Nova Zelandia 21.000
Diretór Jerál SEFOPE, Carlito Rosário Cabral, hateten anunsiu ne’ebé halo bazeia ba rezultadu selesaun dokumentu ne’ebé halo durante ne’e.
“Ita hotu akompañia prosesu ne’ebé ami halo rekrutamentu hahú iha loron 08 to’o loron 12 fulan-Setembru 2025 hodi fó oportunidade ba joven timoroan sira aplika ba vaga ida-ne’e liuhusi sistema online,” Diretór Jerál ne’e hateten ba jornalista sira iha edifísiu SEFOPE, Kaikoli, segunda ne’e.
Diretór ne’e dehan, prosesu rekrutamentu ne’ebé mak aplikante sira submete dokumentu hamutuk 20.859 mak rejista iha sistema online vaga RSE ne’e, maibé 2.186 mak prienxe kriteria hodi pasa iha prosesu selesaun dokumentu no seluk la prienxe kritéria ne’e tenke elemina.
Enkuantu, kandidatu hirak ne’ebé pasa ona iha selesaun dokumentu, hein de’it hodi avansa ba teste eslrita no entrevista.
Nia esplika, kandidatu hirak ne’ebé la pasa tanba dokumentu la kompletu, balun idade boot liu no balun falsifika dokumentu no la prienxe pergunta ne’ebé mensiona iha sistema online.
“Prosesu entrevista hodi hatene kandidatu sira-nia koñesementu ba lian inglés, atu ita bele prepara lista badak ida hodi fó dadus ba empregadór. Iha teste entrevista nian, entrevista direta husi ekipa SEFOPE no iha prosesu ikus empregadór rasik mak sei halo tan entrevista,” Diretór ne’e esplika.
Totál kandidatu vaga RSE Nova Zelandia 2.186, kompostu husi Munisípiu Aileu hamutuk 135 ne’ebé kompostu husi mane 86 no feto 49, Ainaru hamutuk 165 kompostu husi mane 108 no feto 57, Ataúru totál na’in-ualu (8) ne’e mesak mane hotu, Baukau hamutuk 257 kompostu husi mane 170 mo feto 87, Bobonaru hamutuk 199 kompostu husi mane 156 no feto 43, Kovalima hamutuk 128 ne’ebé kompostu husi mane 95 no feto 33, Dili hamutuk 327 kompostu husi mane 211 no feto 116.
Entretantu, Munisípiu Ermera kandidatu ne’ebé pasa hamutuk 151 ne’ebé kompostu mane 115 no feto 36, Lautein hamutuk 211 kompostu husi mane 147 no feto 64, Likisa hamutuk 58 kompostu husi mane 44 no feto 14, Manatutu hamutuk 100 kompostu husi mane 78 no feto 22, Manufahi hamutuk 70 kompostu husi mane 43 no feto 27, Oekusi hamutuk 33 kompostu husi mane 30 no feto na’in-tolu (3), Vikeke hamutuk 329 kompostu husi mane 235 no feto 94.
Notísia Relevante: SEFOPE hahú anúnsiu vaga online ba joven sira servisu iha Nova Zelandia
Jornalista : Alexandra da Costa
Editór : Cancio Ximenes
