OEKUSI, 20 Outubru 2025 (TATOLI) – Sekretáriu Estadu Ensinu Sekundáriu Jerál (ESG, sigla Portugés) no Ensinu Tékniku Vokasionál (ETV), Domingos Lopes Lemos, promete Governu liuhusi Ministériu Edukasaun (ME), sei dezloka ekipa inspesaun jerál hodi investiga dirijente sira iha estabelesimentu ensinu balun iha munisípiu Baukau kona-ba motivu estudante sira prátika arte marsiál ho uniforme eskolár iha aredór estabelesimentu ensinu referidu.
“Vídio ne’e ha’u mós foin haree iha semana kotuk iha mídia sosiál Facebook, depoisde ezame nasionál, sei haruka inspesaun jerál sira sei ba to’o eskola referida atu haree no investiga didi’ak,” Governante informa ba jornalista sira iha Oekusi, ohin.
Tuir nia, iha fatin barak, Governu sempre fó hanoin ona no mós koopera di’ak ho Autoridade seguransa sira liu-liu PNTL, atu fó seguransa ba situasaun sira-ne’e, maibé realidade hatudu katak, iha mídia sosiál, akontese iha Baukau, estudante sira prátika arte marsiál, maske la autorizadu, tanba rezolusaun Governu nian, fó sai antes ona katak, sei labele aplika arte marsiál no arte rituál iha eskola sira.
“Tanba ne’e, ita sei foti medida ida ba profesór sira, liu-liu diretór eskola ne’e, nia estudante rasik prátika arte marsiál iha oras prosesu aprendizajen,” nia promete.
Entretantu, antes ne’e, Governu liuhusi reuniaun Konsellu-Ministru kontinua suspende ensinu, aprendizajen, no prátika arte marsiál iha arredór eskola to’o 31 Dezembru 2025, inklui rituál sira ne’ebé relasiona.
Rezolusaun Governu kona-ba suspensaun arte marsiál nian iha eskola no fatin edukativu fó resposta ba preokupasaun seguransa no pás sosiál. Medida ne’e estende ona husi rezolusaun sira anteriór, inklui:
- Rezolusaun Governu n.° 45/2023 (10 Novembru 2023): inísia suspensaun ba prátika arte marsiál.
- Rezolusaun Governu n.° 17/2024 (24 Abríl 2024): prolonga suspensaun.
- Rezolusaun Governu n.° 60/2024 (7 Novembru 2024): estende tan.
- Rezolusaun Governu Abríl 2025: kontinua suspensaun to’o 31 Dezembru 2025, inklui taka temporáriu fatin no instalasaun ba ensinu, aprendizajen, no prátika arte marsiál
Notísia relevante: https://tatoli.tl/2025/04/02/governu-kontinua-suspende-pratika-arte-marsial-too-dezembru/
Jornalista: Abílio Elo Nini
Editór: Rafael Ximenes de A. Belo
