DILI, 02 Abríl 2025 (TATOLI) – Ensinu, aprendizajen no prátika arte marsiál kontinua suspende to’o 31 Dezembru 2025 no taka temporáriu ba fatin no instalasaun hotu-hotu ne’ebe destinadu ba ensinu, aprendizajen no prátika arte marsiál.
Projetu rezolusaun ne’ebé ohin Konsellu Ministru aprova ne’e aprezenta husi Primeiru-Ministru, Kay Rala Xanana Gusmão.
Tuir nota husi Governu, medida ida-ne’e fó kontinuasaun ba Rezolusaun Governu n. 45/2023, loron 10 fulan-novembru, ne’ebé prolonga ona husi Rezolusaun Governu n. 17/2024, loron 24 fulan-abríl no n. 60/2024, loron 7 fulan-Novembru.
Dokumentu ne’e haktuir katak razaun sira ne’ebé motiva suspensaun ba ensinu, aprendizajen no prátika arte marsiál no halo enserramentu ba ninia espasu sira, mantein nafatin.
Suspensaun ba prátika arte marsiál ne’e halo tanba konsidera nesesáriu hodi hametin pás sosiál ne’ebé halo dezde Novembru 2023 no asegura katak, iha futuru, prátika arte marsiál akontese de’it iha ámbitu desportivu, hodi promove valór dixiplina, sivizmu no formasaun umanista entre joven sira.
“Ida-ne’e maka sai justifikasaun hodi estende suspensaun no enserramentu temporáriu ba instalasaun sira ne’ebé relasiona ho atividade sira-ne’e”, dehan.
Notísia relevante: Governu deside extende suspensaun prátika arte-marsiál to’o 10 abríl 2025
Jornalista: Arminda Fonseca
Editora: Maria Auxiliadora
