DILI, 20 Outubru 2025 (TATOLI)–Tribunál Judisiál Primeira Instánsia Dili (TJPID), Sesta ne’e, kontinua halo rejulgamentu ba kazu omesídiu niglijente ne’ebé halakon Zizelma Maria Fátima Gonçalves nia vida iha loron 13 Marsu 2025.
Iha audiénsia julgamentu, Tribunál rona uluk depoimentu husi Sasin Domingos dos Reis Amaral de Sousa ne’ebé deklara katak, momentu ne’ebá sasin tuur hela iha toto bola nia oin, sasin haree vítima atravesa mai sorin no iha karreta ida halai mai fó lampu no para tiha, derrepente motór ida mai husi kotuk halai maka’as hodi xoke vítima.
Sasin deklara, nia haree vítima monu, sasin mós trauma hodi halai tama bá laran no fó hatene ba ema sira ne’ebé mak iha toto bola laran.
Hafoin rona tiha sasin nia depoimentu, iha audiénsia julgamentu, Asistenste Zizelma, Defensór Públiku Estaquio Guterres solisita ba Tribunál molok atu hakat bá alegasaun, Tribunál tenke halo inspesaun iha lokál krime, liuliu fatin ne’ebé Zizelma hetan asidente to’o hakotu iis, nune’e bele hatene faktu loloos.
Pedidu seluk husi Asistente Estaquio, husu atu Tribunál fó tempu ba asistente atu ko’alia ho vítima nia família kona-ba indenizasaun.
Notísia relevante : Tribunál halo rejulgamentu ba kazu omisídiu neglijente ne’ebé halakon Zizelma nia vida
Maibé Tribunál liuhusi Juíz Prosesu José Gonçalves indefere pedidu ne’e no provínsia la presiza ba halo inspesaun iha lokál krime maibé halo de’it ezame ba CCTV ne’ebé oferese husi Loja Funan Buras.
Tribunál hafoin haree tiha CCTV, konfirma ba vítima nia aman no vítima nia aman deklara katak, vídeo ne’ebé Tribunál fó sai ona hanesan mós vídeo ne’ebé vítima nia aman iha.
Tribunál konfronta kona-ba vídeo ne’ebé iha CCTV, ba sasin Domingos dos Reis Amaral de Sousa, kona-ba karreta mutin ne’ebé iha, sasin deklara karreta mutin ne’e para antes ona, depois iha kondutór husi karreta ida fó hela lampu sinál ba vítima atu liu, maibé arguidu kondús ho velosidade maka’as hodi xoke vítima.
Aleinde ne’e, sasin haree vítima atravesa liuhusi zebra cross ho lalais.
Tribunál konfronta kona-ba vídeo ne’e ba sasin Nélia Maria da Rosa Verdial De Araujo ne’ebé deklara nia maka ema dahuluk halai ba haree vítima, tuir sasin hatene sura husi motór soke vítima to’o iha fatin ne’ebé vitima monu ba kuaze metru haat ka lima.
Tribunál haree fali deklarasaun ne’ebé mai husi Polísia Tránzitu katak, sukat husi vítima monu to’o iha fatin akontesementu kuaze metru ualu.
Hafoin Tribunál halo tiha konfrontasaun ba CCTV, Defeza arguidu nian, Advogadu Privadu Americo deklara, kona-ba atu halo inspesaun lokál la nesesáriu tanba rona ona sasin na’in-rua, inklui mós haree ona CCTV ne’ebé iha, tanba ne’e defeza husu Tribunál maka tetu.
Hafoin rona tiha defeza husi Arguidu nian, Tribunal deklara katak, fiar ba deklarasaun husi autoridade tránzitu iha diagrama ne’ebé iha katak sira sukat husi fatin ne’ebé vítima monu to’o iha fatin ne’ebé vítima latan iha metru ualu.
Tanba ne’e, Tribunál entende la nesesariu halo inspesaun, tanba nee Tribunal indefere pedidu inspesaun ne’ebe mai husi asistente, ne’ebé husu atu halo inspesaun ba iha lokál de akontesementu.
Kona-ba pedidu indimizasaun Tribunál aseita, fó tempu ba iha asistente atu ko’alia ho vitima sira kona-ba indenizasaun patrimoniál no naun patrimoniál.
Hafoin rona parte hotu, Tribunál adia ba loron 27 Outubru 2025 tuku 14:00 hodi halo alegasaun ba kazu ne’e.
Jornalista : Natalino Costa
Editora : Julia Chatarina
