DILI, 20 outubru 2025 (TATOLI)—Xefe Departamentu Imunizasaun Ministériu Saúde (MS), Maria Angelina Pereira, informa iha loron 9 fulan-Outubru ne’e, Fundu Nasaun Unidas ba Labarik (UNICEF-singla inglés) hatama vasina Rotavírus kuaze doze 12.000 mai Timor-Leste.
“Vasina Rotavirus, ita-nian hotu kuaze tinan ida (1) ona, maibé foin lalais ne’e, ami simu de’it doze 12.800 husi UNICEF. Ne’e pozitivu tebes, tanba ita-nia labarik barak agora iha taxa moras diáriu ne’ebé aas tebes kona-ba diareia. Ho vasina ne’ebé iha ona bele prevene moras sira-ne’e,” Maria Angelina hateten iha edifisiu MS Kaikoli, segunda ne’e.
Nia esplika, vasina Rotavirus ne’e serve atu prevene moras loro-loron no profisionál saúde sira esforsu atu kontinua fó informasaun ba inan-aman sira atu nune’e bele lori oan ba vasina.
“Atu asegura ita-nia oan sira la hetan moras loro-loron, prepara aihan ne’ebé moos, saudavel no fó susu ba ita-nia oan sira. Agora atu fó susu ba ita-nia oan sira, ita presiza tau matan ba ekipamentu no ekipamentu sira-ne’e, atu nune’e sira labele afetadu husi moras loro-loron nian,” nia hateten.
Maria hatutan, ida-ne’e esforsu profesionál saúde sira-nian atu serbí komunidade liu-liu labarik sira-ne’ebé seidauk hetan vasina kontra Rotavirus.
“Ami hein atu simu liu doze 12.000 husi vasina iha fulan ne’e, maibé programa nasional sei distribui ba munisípiu 13 iha tempu badak. Ami-nia kobertura ba Rotavírus iha tinan liubá mak 93%, maibé tinan ne’e iha de’it 35%,” nia esplika.
Durante tinan ida-resin laiha vasina Rotavirus, maibé ho apoiu husi UNICEF daudaun ne’e Timor-Leste iha ona vasina referidu.
Ho nune’e, Diretora ne’e alerta ba inan-aman hotu atu lori oan ba sentru no postu saúde sira atu simu vasina Rotavirus hodi prevene aan husi moras diareia ka moras loro-loron.
Jornalista : Felicidade Ximenes
Editór : Cancio Ximenes
