Estudante finalista rihun 2-resin tuir ezame nasionál iha Kovalima
KOVALIMA, 21 Outubru 2025 ( TATOLI)-Diretora Servisu Munisipál Edukasaun Kovalima, Elda de Fátima, relata estudante finalista rihun 2-resin maka daudaun ne’e tuir ezame nasionál tinan letivu 2025 iha Kovalima.
Diretora Servisu Munisipál Edukasaun Kovalima, Elda de Fátima, informa katak, Alunu finalista tinan akadémiku 2025 hala’o ezame nasionál durante loron rua ona ne’ebé tuir relatóriu alunu finalista na’in-rua maka la tuir ezame nasionál.
“Ita-nia alunu finalista ne’ebé atu tuir ezame nasionál iha munisípiu Kovalima hamutuk rihun-2-resin kompostu husi alunu finalista ensinu báziku 1.332 kompletu tuir ezame no alunu finalista husi ensinu sekundáriu 1.257, na’in rua auzente iha ezame nasionál no alunu husi ensinu tékniku vokasionál na’in-100,” nia informa ba TATOLI, iha Edukasaun Kovalima.
Nia esplika estudante finalista na’in ida la tuir ezame ho rajaun tanba moras no sei tuir ezame iha etapa tuirmai. Enkuantu finalista na’in-rua husi ensinu sekundáriu la tuir ezame nasionál tanba sira maka lakoi tuir ezame.
Entertantu, ezame nasionál no lokál tinan ne’e hahú ona iha loron 20 fulan-Outubru no sei remata iha loron 25 fulan-Outubru 2025.
Notisia relevante:Estudante ESJ 04 Setembru na’in-ida no FINANTIL na’in-17 la tuir ezame nasionál
Jornalista:Celestina Teles
Editór:Florencio Miranda Ximenes
