BOBONARU, 21 Outubru 2025 (TATOLI)-Sentru Jouventude Munisípiu Bobonaru (SJMB) organiza formasaun ba joven hamutuk 100 hodi hasa’e sira-nia koñesimentu kona-ba sistema kontrolu ba Orsamentu Jerál Estádu (OJE).
Aktividade ne’e realiza tanba hetan apoia husi Ministeriu Juventude, Desportu, Arte no Kultura (MJDAK) no UNICEF, ho tema “Haforsa lideransa foinsa’e sira-nia koñesimentu no abilidade atu partisipa signifikativa”.
Diretór Ezekutivu Sentru Juventude Munisípiu Bobonaru, Alcino Lopes, dehan objetivu husi formasaun ne’e mak atu hakbiit koñesimentu joven feto no mane hodi halo kontrolu ba iha OJE.
“Bainhira mak debate, bainhira mak aprova, no bainhira mak promulga. Ida-ne’e maioria ita seidauk hatene, bainhira ita hatene ita bele halo kontrolu ba OJE”, Alcino Lopes hateten iha salaun enkontru Krús Vermella Timor-Leste, Maliana.
Diretór-Jerál MJDAK, David Tomás de Deus, reforsa katak formasaun ne’e realiza atu joven sira ativu liután hodi hola parte iha diskusaun sira no halo advokasia iha komunidade. Aleinde ne’e atu promove liután akuntabilidade lideransa hodi kontribui ba harii nasaun ida ne’ebé forte.
“Ita mai halo formsaun ne’e tanba iha tinan hirak liubá ami hamutuk ho UNICEF halo peskiza ida iha Maliana, Ermera, kona-ba partisipasaun joven sira-nia iha prosesu hotu-hotu. Husi rezultadu peskiza ne’e hatudu katak partisipasaun joven sira-nia menus tebetebes iha aspetu foti desizaun sira hahú husi kraik mak mai”, nia relata.
Reprezenta UNICEF, João Costa, dehan atividade ida-ne’e hanesan akompañamentu ida ba lansamentu Módulu Orsamentu Jerál Estadu nian iha fulan-Jullu tinan 2025, ne’ebé dezeña atu hametin partisipasaun juventude sira-nian iha prosesu dezenvolvimentu orsamentu Timor-Leste.
Objetivu prinsipál husi módulu ne’e, tuir João, atu promove literasia orsamentál no envolvimentu joven no líder komunitariu sira oinsá atu komprende orsamentu ne’ebé sira planeia, aloka no gasta.
“Nia objetivu atu kapasita joven sira partisipa ho signifikativa iha prosesu governsaun ne’ebé fó impaktu ba sira-nia moris hodi apoia objetivu nasionál atu harii jerasaun ho abilidade, envolve iha demokrasia no dezemvolvimentu”, salienta.
Formasaun ne’e hanesan pasu importante ida atu haforsa koñesimentu no abilidade joven ho lider lokál hodi hola parte iha foti desizaun ne’ebé forma Timor-leste nia futuru iha munisípiu, postu, suku no aldeia sira.
“Ha’u enkoraja foinsa’e sira atu uza oportunidade ne’e hodi aprofunda sira-nia kompriensaun no kapasidade atu influensia desizaun sira ne’ebé afeta diretamente ba sira-nia moris, liuliu iha suku no aldeia”, realsa.
Fundu ba realizasaun atividade ne’e hamutuk rihun $11-resin husi MJDAK no UNICEF.
Jornalista: Sergio da Cruz
Editora: Maria Auxiliadora
