Konstrusaun edifísiu ba akademia militár konjunta iha Aileu hahú la’o
DILI, 21 Outubru 2025 (TATOLI)–Ministru Defeza Kontra Almirante Donaciano Costa Gomes ‘Pedro Klamar Fuik’ hateten, konstrusaun edifísiu ba akademia militár konjunta ne’ebé hala’o iha Munisípiu Aileu hahú la’o.
“Progresaun ba akedemia militár konjuta la’o hela, la’o di’ak loos, ita bele hateten katak sei kumpre objetivu ne’ebé mak ita define,” Klamar Fuik hateten ba Jornalista sira hafoin partisipa audiénsia públika ho Komisaun B ne’ebé trata iha asuntu asuntu defeza, seguransa, no negósiu estranjeiru iha Parlamentu Nasionál, Tersa ne’e.
Notísia relevante : Governu hatuur fatuk dahuluk ba konstrusaun edifísiu akademia militár iha Aileu
Obra konstrusaun akademia militár konjunta ne’e sei termina iha loron 02 Fevereiru 2026. Governu liuhusi Ministeriu Defeza define kalendáriu katak obra ne’e tenke hotu iha 2026.
“Ita sei halo inaugurasaun ba edifísiu ne’e iha loron ne’ebé ita temi. Nune’e ita bele iha formasaun dahuluk ba primeiru alunu iha tinan 2026 nia laran,” nia tenik.
Jornalista : Natalino Costa
Editora : Julia Chatarina
