Lideransa komunitária Kovalima husu servisu agrikultura jere programa fila rai gratuita ho di’ak
KOVALIMA, 20 Outubru 2025 (TATOLI)-Lideransa Komunitária husi postu administrativu Tilomar no Suai husu ba servisu munisípiu Agrikultura Kovalima atu jere programa fila-rai gratuita ba agrikultór sira ho di’ak liután.
Xefe Suku Lalawa postu administrativu Tilomar, Jeferino de Jesus, hateten servisu munisípiu agrikultura Kovalima, persiza atu jere kombustivél ne’ebé governu oferese ba agrikultór sira hodi fila sira-nia rai ho gratuita tanba durante ne’e akontese agrikultór sira balun la hetan apoiu kombustivél.
Nia relata agrikultór balun antes ne’e hetan ona apoiu kombustivél hosi Ministériu balun hodi dezenvolve atividade ortikultura nian, maibé sira mós hetan apoiu mina gratuita hosi Ministériu Agrikultura Peskas, Pekuária no Floresta (MAPPF) nian nune’e sira simu apoiu kombistivél doubru hosi instituisaun governu.
“Ha’u ko’alia tanba akontese iha Salele postu administrativu Tilomar, munisípiu Kovalima, maske sira hala’o atividade ortikultura programa husi Ministériu Dezenvolvimentu Lokál maibé kontinua hetan oportunidade,” nia hato’o preokupasaun ne’e iha salaun AMC Kovalima.
Iha sorin seluk, Xefe Suku Beco, postu Suai, Arlindo Bernardino Lemos, informa maske durante ne’e governu apoiu mina gratuita ba agrikultór sira, maibé akontese ninia komunidade maka ense rasik hodi fila sira nia rai hodi kuda batar no hare.
“Programa kona-ba apoiu mina gratuita maibé realidade hatudu komunidade sira husi suku Beco sira rasik maka sosa mina ense ba tratór hodi fila sira-nia rai ho folin boot,”nia hateten.
Hatan ba kestaun ne’e, Diretór Servisu Munisipál Agrikultura Kovalima, Lino Magno, hateten apoiu kombustivél ba agrikultór sira ne’e programa nasionál nian no munisípiu mak jere de’it.
“Programa apoiu mina gratuita la’os ita-nia programa, maibé ita halo jestaun de’it hodi fasilita ita-nia agrikultór hodi fila komunidade sira-nia rai la’ós ba ema hotu maibé haree ba komunidade sira ne’ebé maka kbi’it la’ek,”nia esplika.
Tuir dadus iha tinan 2025 ne’e, servisu agrikultura apoiu ona kombustivél litru rihun 15 hodi fila komunidade nia-rai ho gratuita. No daudaun ne’e falta mina litru rihun 5 maka seidauk foti hosi nasionál iha epóka dahuluk nian.
Servisu Munisipál Agrikultura (SMA) Kovalima dadaun ne’e fila ona komunidade sira nia toos rai maran iha administrativu Maukatar, Suai, Tilomar no Zumalai hamutuk ektáre 162,36 no uza ona mina litru 6,490.
Notisia relevante:Servisu munisipál agrikultura Kovalima rekolla ona dadus kultivasaun batar
Jornalista:Celestina Teles
Editór:Florencio Miransa Ximenes
