DILI, 21 Outubru 2025 (TATOLI)—Ministériu Defeza (MD) no instituisaun tutelada hanesan FALINTIL-Forsa Defeza Timor-Leste (F-FDTL) no Institutu Defeza Nasionál (IDN) hetan alokasaun millaun $50 iha Propossta Lei Orsamentu Jerál Estadu (OJE) 2026.
Ministru Defeza Kontra Almirante Donaciano Costa Gomes ‘Pedro Klamar Fuik’ informa, orsamentu ba MD inklui instituisaun tutelada iha tinan 2025 hetan $49 no iha tinan ne’e hetan $50.
“Orsamentu 2026 atu finasia ba prioridade lima ne’ebé Ministeriu Defeza halo, ida mak atu fortalesimentu kapasidade komponente F-FDTL no Autoridade Marrítima Nasionál, oinsá mak atubele kria no hametin kultura institusionál liuliu atubele halo organizasaun ministériu ho institusaun hotu tutela iha Ministériu Defeza sai efetivu no efisiente atubele utiliza orsamentu ne’e halo didiak,” Klamar Fuik hato’o ba Jornalista sira hafoin partisipa iha audiénsia públika ho Komisaun B ne’ebé trata iha asuntu asuntu defeza, seguransa, no negósiu estranjeiru iha Parlamentu Nasionál, Tersa ne’e.
Notísia relevante : Ministru Defeza konsidera kapasidade lideransa importante ba Nasaun
Aleinde ne’e, MD iha planu iha tinan oin atu transforma IDN sai Institutu Universitáriu ba Defeza Nasionál.
Seluk mak sei fó prioridade atu hasai kooperasaun iha ámbitu defeza iha nível internasionál.
MD iha tinan oin atu finansia programa dezenvolvimentu institusionál, liuliu liga ba dezenvolvimentu forsa iha kuadru militár atu prepara futuru membru kualifikadu iha institusaun no nasaun.
Fó mós prioridade ba formasaun nune’e bele hasai abilidade militár iha siénsia militár nian.
Antes ne’e, Ministériu Finansa atribui tetu orsamentu tinan 2026 ba MD hamutuk $8.300.000, ba IDN $1.606.000 no hafoin hetan aumentu hetan $1.700.000 tanba tinan oin sei loke akademia militár konjunta, no F-FDTL hetan millaun $1 hodi reforsa atividade militár tuir lei programasaun militár.
Iha sorin seluk, MD nia ezekusaun orsamentu 2025 atinje ona 62%, ne’ebé ezekuta ba programa tolu hanesan defeza nasionál, fortalesimentu institusionál no fortalesimentu atividade jéneru ba funsionáriu MD no Militár sira ne’ebé hola parte iha grupu jéneru ho efetivu efikásia tuir objetivu ne’ebé mak Governu no Organizasaun Nasaun Unida (ONU) define.
“Fim do ano ita sei atinje ba 94%. Ezekusaun laiha problema,” Klamar Fuik otimista.
Jornalista : Natalino Costa
Editor : Julia Chatarina
