DILI, 21 Outubru 2025 (TATOLI)-Prezidénsia Konsellu Ministru (PCM, sigla portugés) aprezenta proposta Ornamentu Jerál Estadu (OJE) 2026 ho montante millaun $4,9 ba Komisaun A iha Parlamentu Nasionál ba Asuntu Konstitusionál no Justisa.
“PCM nia orsamentu besik millaun $5. Imi hatene PCM ne’e atu haree asuntu legál, tratamentu médiku, inklui Vise-Ministru Asuntu Parlamentár. Tanba orsamentu ne’e abranje membru Governu sira seluk”, Ministru PCM, Agio Pereira, hateten hafoin audiénsia iha sala Komisaun A, ohin.
Governante ne’e esplika katak ba tinan oin PCM iha programa rua no subprograma hitu. Ba Programa Polítika Estratéjika Nasionál prevee millaun $2,09, kobre área sira hanesan apoiu ba Primeiru-Ministru iha koordenasaun serbisu Governu nian, governasaun legál, tradusaun jurídika, polítika públika, komunikasaun estratéjika no asuntu parlamentár.
Programa Funsionamentu no Dezenvolvimentu Instituisionál prevee millaun $2,8, asegura funsionamentu administrativu no dezenvolvimentu organizasionál instituisaun nian.
Orsamentu millaun $3,1 aloka ba saláriu no vensimentu, millaun $1,77 ba bens no serbisu, rihun $50 ba kapitál menór.
Tinan oin, PCM foka prioridade apoia Primeiru-Ministru iha koordenasaun serbisu Governu, governasaun legál Konsellu Konsellu nian, koordenasaun polítika públika estratéjika, komunikasaun estratéjika Governu no promosaun sidadania, nune’e mós akompañamentu matéria ne’ebé iha debate Parlamentu Nasionál no asaun fiskalizasaun parlamentár relasiona ho preokupasaun no nesesidade populasaun nian.
Agio Pereita mós relata progresu ezekusaun OJE 2025 atinje ona 81,5% husi montante inisiál millaun $4,9. “Ne’ebé hatudu ba Komisaun, katak ezekusuan orsamentál PCM nian la’o di’ak hela”, dehan.
Prezidente Komisaun A, Patrocínio dos Reis Fernandes, lidera direta audiénsia ba apresiasaun inisiál ne’e hafoin bele halo diskusaun iha plenária iha faze jeneralidade no espesialidade.
Jornalista: Nelson de Sousa
Editora: Maria Auxiliadora
