CMCLN Bobonaru ezije empreza aselera konstrusaun muru protesaun jardín erói Manu-Kaitete
BOBONARU, Outubru 2025 (TATOLI) – Vise-Prezidente Konsellu Munisipál Kombatente Libertasaun Nasionál (CMCLN, sigla portugés) munisípiu Bobonaru, Lúcio Dinis Marques ‘Onsar’, husu ba empreza AM Lihchoe atu aselera konstrusaun muru protesaun jardín erói Manu-Kaitete, iha suku Manapa, postu administrativu Kailaku, tanba obra ne’e la’o atraza.
Konsellu Kombatente Munisipál hato’o ezijénsia ba empreza atu finaliza lalais obra ne’e, tanba atu haloot restu mortál sira besik 600 ne’ebé durante tinan barak ona konserva hela iha Osoáriu Maliana no Bobonaru ne’ebé nia kondisaun ladún dignu.
“Até agora seidauk finaliza, ami ambisiozu duké restu mortál tau hela iha Osoáriu, di’ak liu tau iha fatin ne’e, fatin Governu prepara ona, más kompañia mak serbisu atraza. Kompañia boot ida mak ka’er, más jardín erói seidauk prontu. Ami seidauk hatene bainhira mak finaliza, tanba buat hotu nasionál mak hatene, ami só bá vizita de’it”, nia informa ba jornalista sira, ohin.
Enjeñeiru empreza AM Lihchoe, Nelson Manuel Ena, garante katak obra ne’e sei finaliza molok tama tinan foun, tanba daudaun progresu fíziku atinje ona 77,24%.
Nia mós rekoñese obra ne’e la’o atraza tanba kondisaun klima, udan la fó biban atu halo mobilizasaun materiál lokál no fabrikadu ba lokál projetu.
“Kondisaun rai iha ne’e kuandu udan tiha ona, kompañia labele halo buat ida, tanba taho maka’as depo’is rai-dodok. Ami esforsu atu finaliza iha Dezembru, maibé depende ba klima” nia promote.
Obra ne’e gasta $408.325,67 ho durasaun kontratu fulan 12. Ministériu ba Asuntu Kombatente Libertasaun Nasionál konstrui Jardín Eroi ne’e ho objetivu mak atu haloot restu mortál erói libertasaun nasionál sira iha fatin dignu.
Notísia relevante: Konstrusaun muru protesaun iha Jardín Erói iha Manu-Kaitete atinje 61%
Jornalista: Sergio da Cruz
Editora: Maria Auxiliadora
