Kondenadu na’in-rua hetan liberdade kondisionál hafoin kumpre metade husi pena
DILI, 22 Outubru 2025 (TATOLI)–Tribunál Judisiál Primeira Instánsia Dili (TJPID), Kuarta ne’e, halo audisaun ba kondenadu na’in-rua ho naran Elvis Mendonça Pereira no Agidio Alves hodi deside liberdade kondisionál, ne’ebé kumpre ona metade husi pena, tinan-rua fulan-neen husi pena efetivu tinan-lima.
Pedidu liberdade kondisionál ne’e mai husi Prokuradór Prosesu António Tavares ne’ebé solisita ba Tribunál.
Nune’e, TJPID aseita pedidu husi Ministériu Públiku (MP) hodi halo kedan audisaun ba kondenadu na’in-rua hodi rona deklarasaun ruma molok fó liberdade kondisionál.
Iha sala julgamentu laran, Juíza prosesu Jumiati Freitas deklara katak, tuir lei molok atu hetan liberdade kondisionál, TJPID tenke halo audisaun hodi konfirma ba kondenadu sira kona-ba hahalok no atividade sira iha prizaun inklui atividade saida mak sira sei halo banhira sai.
Kondenadu Elvis Mendonça Pereira deklara katak, antes ne’e nia hetan pena prizaun tinan-lima tanba komete krime Ofensa Integridade Fízika Grave. Nia deklara katak kumpre ona kastigu.
Bainhira Juíza Julmiati Freitas konfirma atividade durante iha prizaun, kondenadu dehan nia parte lee bíblia, kontrola hirus, karpintaria, no tein.
“Durante iha prizaun laiha sansaun disiplinar ruma,” Kondenadu Elvis akresenta.
Notísia relevante : Tribunál indefere pedidu husi Asistente Zizelma ba inspesaun iha lokál krime
Nia haktuir, banhira sai husi prizaun, la’o bá iha fatin ruma mak hetan vítima, nia n’in rasik sei bolu hodi ko’alia katak nia kumpre ona kastigu tanba nia sala no husu deskulpa atu ba oin idaidak hala’o nia moris.
Kondenadu sente arrepende tebes ho nia hahalok, karik iha li’ur mak ema ruma buka problema ho nia mak nia sei halai sees hodi aprezenta ba iha autoridade seguransa.
“Ha’u promete, bainhira sai husi prizaun sei buka serbisu hodi ajuda tau-matan ba inan ne’ebé faluk,” nia tenik.
Iha fatin hanesan, Tribunál konfirma kondenadu Agidio Alves no nia deklara katak arrepende ona hahalok.
Kondenadu deklara, durante iha prizaun kondenadu nia kaben kontinua bá vizita, tanba ne’e bainhira sai husi prizaun mak sei fila bá sira-nia uma no buka serbisu hodi tau-matan ba oan sira.
Tribunál liuhusi prosesu audisaun ne’e deklara ba kondenadu na’in-rua katak, sira na’in-rua kumpre ona prizaun tinan-rua fulan-neen, hela tinan-rua fulan-haat, tanba ne’e durante períodu ne’e labele halo krime.
“Se halo krime foun, Tribunáll sei halo revogasaun hodi ba kumpre restu husi pena tinan-rua fulan-haat iha prizaun hodi hein julgamentu ba kondenasaun prosesu foun nian,” Juíza Julmiati informa.
Prokuradór António Tavares, husu ba kondenadu, karik bainhira fila bá sosiedade tenke sai ema ne’ebé di’ak no implementa saida mak durante ne’e hanorin ona iha prizaun.
Nune’e mós, Defeza husi Kondenadu Elvis Mendonça Pereira no Agidio Alves, Advogadu Privadu Marinho da Cruz husu ba kondenadu na’in-rua atu bainhira sai bá li’u tenke hatudu ezemplu ne’ebé di’ak ba komunidade no buka serbisu hadook-an husi problema.
Hafoin Tribunál halo tiha prosesu audisaun, Juíza Prosesu Julmiati Freitas deside fó liberdade kondisionál ba kondenadu na’in-rua tanba kumpre ona metade husi pena.
Jornalista : Natalino Costa
Editora : Julia Chatarina
