MOP aprezenta OJE 2026, Parlamentu husu garante kualidade obra

DILI, 22 Outubru 2025 (TATOLI) – Ministériu Obra Públika (MOP) aprezenta proposta Orsamentu Jerál Estadu (OJE) 2026 ho montante $237,108,892 ba Parlamentu Nasionál.

Ministru Obra Públika interinu, atuál Ministru Planeamentu no Investimentu Estratéjiku (MPIE), Gastão de Sousa, dehan verba ne’e hodi aloka ba saláriu no vensimentu $7,354,614, bens no serbisu $17,274,303, transferénsia públika $129,918,321, kapitál menór millaun $5,250, no kapitál dezenvolvimentu $77,311,654.

“Transferénsia públika ne’e ba EDTL ho BTL”, governante ne’e hato’o bainhira halo audiénsia ho Parlamentu, kuarta ne’e.

Tuir livru OJE 2026, MOP iha Programa Estrada no Ponte, Programa Funsionamentu no Dezenvolvimentu Instituisionál, Programa Bee no Saneamentu, Programa Eletrisidade no Programa Laboratóriu Infraestrutura.

Governante ne’e aprezenta mós ezekusaun OJE 2025 husi MOP ne’ebé to’o iha loron 07 Outubru atinje ona 83,31%, husi montante inisiál $270,759,350.

Aprezenta mós reseita ne’ebé kolleta dezde Janeiru tinan ne’e husi instituisaun tutela hanesan Eletrisidade Timor-Leste, Empreza Públika (EDTL, E.P) $49,717,647, Bee Timor-Leste Empreza Públika (BTL, E.P) $1,618,606, Laboratóriu Nasionál $313,701, Institutu Jestaun Ekipamentu Apoiu Dezenvolvimentu Infraestrutura, Institutu Públiku (IGEADI, I.P) $129,939, Unidade Sertifikasaun rihun $150, no Diresaun Nasionál Aprovizionamentu $13,935.

Tuir livru OJE 2026, proposta despeza tuir setór infraestrutura no konetividade ba Estrada no Ponte prevee millaun $223 hodi finaliza estrada nasionál kilómetru (km) 250, estrada munisipál 156 km, estrada urbana 143 km, estrada rurál 640 km no unidade ponte hitu.

Notísia relevante: https://tatoli.tl/2025/10/15/ezekusaun-fundu-infraestrutura-atinje-300-iha-trimestre-datoluk-2025/

Iha aprezentasaun proposta OJE ne’e, deputadu sira apresia progresu serbisu Governu nian ba dezenvolvimentu infraestrutura ne’ebé la’o makas tebes durante mandatu tinan rua, hodi kontinua rekomenda tau atensaun ba rekursu umanu hodi kontrola ezekusaun obra atu garante kualidade, liuliu hahú husi halo estudu, dezeñu, avaliasaun no fiskalizasaun.

Governu presiza haree polítika no mekanizmu di’ak hodi solusiona implementasaun obra sira iha Kapitál Dezenvolvimentu no Fundu Infraestrutura, tanba kada tinan prosesu administrativu sira sempre la’o tarde.

Ministru Gastão de Sousa aprezenta mós proposta OJE 2026 iha Fundu Infraestrutura hamutuk millaun $301,7 hodi finansia programa 30.

Notísia relevante: https://tatoli.tl/2025/10/09/proposta-oje-2026-governu-prevee-millaun-301-7-iha-fundu-infraestrutura/

Jornalista: Nelson de Sousa

Editora: Maria Auxiliadora