MS enkoraja inan sira atu fó susu-been eskluzivu ba bebé foin moris

DILI, 22 Outubru 2025 (TATOLI)—Minsiteriu Saude liuhusi liuhosi Diresaun Nasionál Nutrisaun, enkoranja inan sira atu fó susuben eskluzivu ba bebé sira-ne’ebé foin moris.

“Ita ko’alia kona-ba susu-been inan nian ita ko’alia mós kona -ba aihan ida-ne’ebé mak bebé sira atu konsumu. Tanba ne’e, ita-nia inan-aman sia atu bele apoia inan sira-ne’ebé mak iha bebé atu bele kontinua prátika fó susu-been inan nian ba sira-nia oan durante moris mai,” Diretora Nasional Nutrisaun Ministériu Saúde, Rosye da Silva, hateten ba jornalista sira iha Delta Nova, ohin.

Nia dehan, ko’alia kona-ba prátika fó inan nia susu-been ba bebé ne’e mak alimetasaun no nutrisaun ida-ne’ebé mak úniku no valór nutrisaun ne’ebé mak di’ak-liu atu proteje ba bebé sira.

“Ho nune’e, ami enkoraja ema hotu atu bele apoiu inan sira atu bele fó susu-been inan nian ba bebé durante moris to’o bebé halo fulan neen, ne’ebé ita bolu eskluzivu to’o susu-been inan nian ne’e to’o ba bebé tinan rua, akompaña ho hahan komplementár seluk,” nia dehan.

Nia esplika, durante ne’e pesoal saúde mós rekolla dadus ba bebé sira-ne’ebé mak moris mai simu kedas susu-been eskluzivu to’o fulan neen.

“Ita mós rekolla dadus ba sira-ne’ebé mak susu iha oras dahuluk, sira susu ona iha ne’eba tanba susu-been kinur importante tebes ba labarik nia saúde tanba iha konteúdu antibody atu proteje ba infeksaun sira-ne’ebé mak inan sira fó ba nia oan liuhusi susu-been inan nian ne’e. Agora kona-ba susu-been eskluzivu hanesan susu-been ne’ebé inan sira fornese susu-been loos de’it, la tau buat seluk ka aihan seluk ne’ebé mak nia fó ba bebé durante bebé moris to’o fulan-neen nia laran,” nia hateten.

Jornalista : Felicidade Ximenes

Editór        : Cancio Ximenes