Autoridade Uaimori husu PAM reabilita sítiu Ueluli-Manas
VIKEKE, 23 Outubru 2025 (TATOLI)–Xefe Suku Uaimori, Postu Administrativu Vikeke Vila, Munisípiu Vikeke, Francelino António Gomes, husu Prezidente Autoridade Munisípiu (PAM) Vikeke hodi reabilita sítiu Ueluli-Manas ne’ebé antes ne’e Governu konstrui ona fasilidade.
“Sítiu turizmu iha Munisípiu Vikeke barak, maibé ita tenke kria planu hodi reabilita sítiu Ueluli-Manas ne’ebé agora nia kondisaun aat,” Francelino ba TATOLI iha Postu Vikeke Vila, Kinta ne’e.
Xefe Uiamori ne’e relata, Sítiu Ueluli-Manas iha tinan 2022 Governu gasta orsamentu hamutuk $16.150 hodi konstrui icon fatin foto hamutuk sanulu (10), baraka tradisionál lima, fatin da’an manu tolu rua, fatin kadoras ida, fatin suas ida.
Hatán ba preokupasaun ne’e, Prezidente Autoridade Munisipál Vikeke, Francisco C. S de Gonzaga Soares, haktuir kona-ba Sítiu Ueluli-Manas tama ona planu 2026 hodi halo reabilitasaun.
“Kona-ba Ueluli-Manas ita tau ona planu ba 2026. Ita sei halo reabilitasaun no halo espansaun espasu sira iha área Ueluli-Manas, atu vizitór lokál no internasionál bá vizita iha espasu ne’ebé luan. Tanba Ueluli-Manas ne’e ita haree ninia benifísiu barak,” nia subliña.
Sítiu Turizmu Ueluli-Manas lokaliza iha Suku Uaimori, Postu Administrativu Vikeke Vila. Ueluli-Manas idéntiku ho bee-manas ne’ebé sai husi fatuk laran.
Jornalista: Vitorino Lopes da Costa
Editér: Xisto Freitas da Piedade
