DILI, 23 Outubru 2025 (TATOLI) – Kámara Komérsiu no Indústria (CCI-TL, sigla portugés) ho Grupu Alam Jabar, husi Indonézia, planeia atu dezenvolve indústria adubu orgániku iha Timor-Leste.
Vise-Prezidente CCI-TL ba Asuntu Agrikultura, Rui Castro, informa katak realiza enkontru ho Grupu Alma Jabar, tanba iha ona kooperasaun ida iha setór agríkola, liuliu atu vizita munisípiu sira iha parte leste hodi haree poténsia abudu orgániku nian.
Nia esplika katak atividade ne’e importante tebes tanba depoizde Timor-Leste tama ASEAN, saida mak setór privadu atu haruka bá li’ur, entaun Governu orienta katak setór privadu foku ba área agrikultura ida ho orgániku.
Entaun, tuir nia, bainhira agrikultura orgániku la prepara, ida-ne’e sai problema boot, tanba tama ASEAN ema mai vizita Timor-Leste lori ho sira-nia produtu fa’an, maibé setór privadu sira atu lori saida ba ema nia rai, tanba durante ne’e ko’alia mak kafé, baunila no seluk tan, maibé nia kuantidade mós menus ba beibeik.
“Kooperasaun ida ho Alam Jabar ne’e ohin ita halo reuniaun dahuluk, tanba ita vizita ona sira, agora sira mak mai fali. Ami ko’alia kona-ba oinsá mak atu dezenvolve indústria adubu orgániku ne’ebé ho matéria prima hothotu iha Timór no sei lori sira bá vizita kondisaun Timór no fulan oin sira-nia ekipa téknika sei mai atu realiza akordu hodi implementa”, Rui Castro hateten iha CCI-TL, Akait, ohin.
Durante ne’e, CCI-TL perkorre ona munisípiu hotu no identifika problema sira mak tenke dezenvolve adubu orgániku.
“Ita iha matéria prima barak hanesan ai-abut, ai-dodok, karau-teen, fahi-teen no seluk tan ne’ebé bele halo adubu orgániku, maibé falta de’it mak rekursu umanu, entaun ita presiza halo kooperasaun ho sira hodi harii indústria adubu orgániku iha Timór”, nia subliña.
Tuir nia, Timor-Leste tenke investe iha indústria ne’e, tanba Primeiru-Ministru, Xanana Gusmão, rasik orienta katak produtu Timór tenke ho orgániku.
“Tanba ita ba ho produtu pupuk kímiku, ita labele duni ho nasaun seluk ASEAN nian tanba sira avansada ona. Ita-nia mak tenke idéntiku ho orgániku, entaun koko ida-ne’e hodi responde ba iha lanu Governu nian”, dehan.
Iha tempu badak, CCI-TL ho Grupu Alam Jabar sei halo vizita bá natar sira iha Baukau, Manatutu no Lautein.
Iha fatin hanesan, Prezidnete Grupu Alam Jabar, Irfan Fazrian, hateten sira sei hamutuk ho CCI-TL hodi bá munisípiu sira ne’ebé iha poténsia ba setór agríkola.
“Espera katak ho kooperasaun sira sei iha akordu iha tempu mai, nune’e bele serbisu hamutuk ba oin, ita sei ajuda Timor-Leste ne’ebé iha natar barak bele prodús hare ho kualidade no orgániku. Ami garante katak kooperasaun ne’ebé iha tinan 30 ka 40 mai Timor-Leste bele sai nasaun ne’ebé prodús foos orgániku hodi responde ba nesesidade merkadu nian”, nia dehan.
Notísia relevante: CCI-TL konsidera Fórum Investimentu Turizmu 2025 identifika solusaun ba turizmu TL
Jornalista: Arminda Fonseca
Editora: Maria Auxiliadora
