DILI, 23 Outubru 2025 (TATOLI)—Governu Timor-Leste liuhusi Ministériu Edukasaun (ME) kontinua reforsa kooperasaun ho Governu Portugál liuhusi Embaixada Portugál ba projetu Sentru Aprendizajen no Formasaun Eskolár (CAFE-sigla portugeza) no mós formasaun língua portugeza ba profesór sira.
Ministra Edukasaun, Dulce de Jesus Soares hateten ohin parte ME ho Embaixadór Portugál realiza enkontru kortezia ida, hodi ko’alia kona-ba servisu ne’ebé Ministériu Edukasaun iha kooperasaun ho Embaixada Portugál.
“Tanba ita-boot sira hatene, ita iha estudante kuaze 10.000 mak estudu hela iha eskola CAFE hamutuk 14 iha Timor-Leste. Projetu ne’e ita hala’o tinan sanulu (10)-resin, nune’e tinan oin ita komesa halo avaliasaun ba projetu ne’e rasik,” Ministra Edukasaun dehan ba jornalista sira iha salaun ME, Vila Verde, Kinta ne’e.
Aleinde ne’e mós, Embaixada Portugál halo kooperasaun iha projetu pro-portugés formasaun ba profesór sira, ne’ebé liuhusi Institutu Camões.
Governante ne’e hatutan, parte rua iha inisiativa atu halo avaliasaun ba projetu referidu, maibé pozisaun ME nian sei kontinua nafatin ho kooperasaun ida-ne’e.
“Tanba ne’e ita hakarak nafatin profesór portugés sira atu reforsa, ita-nia profesór timoroan ne’ebé agora hanorin iha eskola CAFE, la’ós iha língua portugeza de’it maibé importante tebes ba materia sira seluk mós,” nia akresenta.
Ministra Dulce afirma kooperasaun ne’e parte boot ida mak formasaun profesór, ne’ebé mak Governu liuhusi ME halo investimentu boot tebes iha língua portugeza.
“Tanba ne’e ita kontinua nafatin ho formasaun ba profesór sira, no mós ha’u hakarak husu profesór sira tenke hakas-aan aprende atu uza língua portugeza, liuliu baninhira hanorin iha 7o– 12o ano tanba matéria hotu iha língua portugeza,” Ministra Dulce tenik.
Iha fatin hanesan, Embaixadór Portugál iha Timor-Leste, Duarte Bué Alves, informa ema hotu hatene no rekoñese domíniu ba edukasaun no língua portugeza sai prioridade absoluta ba Portugál.
“Tanba ne’e, enkontru ida-ne’e signifikativu no importante tebes ba ha’u atu rona no halibur ideia husi Ministra Edukasaun, atubele servisu ba nesesidade edukasaun Timor Leste nian,” nia hateten.
Diplomata ne’e subliña, iha enkontru referidu parte rua deside atu avalia projetu ne’e hotu, nune’e bele di’ak liután iha pasu tuirmai.
“Ami deside atu avalia projetu rua ne’e, atu hetan akordu ida kona-ba nesesidade ida-ne’e hodi hadi’a no hakat ba pasu tuirmai, kona-ba programa sira hosi 2025 to’o 2028. Ami diskute mós kona-ba kontestu no filozofia CAFE nian, tanba ami servisu iha Timor-Leste no ba Timor-Leste ami servisu hamutuk ho Timor-Leste,” nia konklui.
Jornalista: Osória Marques
Editór: Xisto Freitas da Piedade
