Adere ba ASEAN, prezidente CCITL Vikeke apela emprezáriu sira prepara aan
VIKEKE, 24 Outubru 2025 (TATOLI)—Prezidente Kámara Komérsiu no Indústria Timor-Leste (CCITL-sigla portugeza), Florêncio Armindo da Costa, apela ba emprezáriu Vikeke-oan sira atu prepara aan hodi enfrenta membru Association of Southeast Asian Nations (ASEAN).
“Parabéns ba Timor-Leste tanba loron 26 fulan-Outubru ne’e ita sai ona família boot ba ASEAN. Hanesan Preziente CCTL Munisípiu Vikeke, ha’u-nia hanoin bá-oin ita tenke prepara aan tanba ne’e ita tama ona bá merkadu livre, entaun setór privadu tenke prepara aan, tenke prontu no tenke hadi’a aan atubele kompete emprezáriu sira husi nasaun ASEAN,” Florêncio ba TATOLI iha Postu Vikeke Vila, Sesta ne’e.
Tuir nia, parte Governu tenke kria lei ba rai ne’ebé forte hodi fó benefísiu ba setór privadu sira no fó benefísiu ba parseiru sira husi membru ASEAN sira.
“Ba setór privadu sira iha Munisípiu Vikeke, ita tenke prepara ita-nia kondisaun, prepara ita-nia aset (rai) no Governu mós tenke kria lei rai nian ida forte tanba daudaun ne’e ita haree ita-nia lei ba rai seidauk forte para ita-nia parseiru ho ita-nia família boot emprezáriu husi ASEAN mai ita-nia rai halo parseiru ka joint negósiu,” nia subliña.
Nia esplika Timor-Leste ohin loron seidauk define sertifikasaun ba rai, tan ne’e labele asegura investimentu nasionál no internasionál.
Tuir dadus, empreza sira-ne’ebé eziste iha Munisípiu Vikeke ho hamutuk 170. Husi númeru ne’e, empreza sira maioria envolve iha área konstrusaun.
Jornalista: Vitorino Lopes da Costa
Editór: Xisto Freitas da Piedade
