Assanami: “Ita ko’alia kona-ba sistema aihan nian, ita ko’alia kona-ba produsaun”
DILI, 24 Outubru 2025 (TATOLI)—Movimentu Jerasaun Nutrisaun (MJN) hamutuk ho Fundu Nasoins Unidas ba Labarik (UNICEF-sigla portugés) hala’o semináriu nasionál hodi komemora Loron Mundiál Nutrisaun ne’ebé mundu tomak selebra iha kada 16 Outubru, iha ámbitu sistema aihan no hametin hadi’a nutrisaun iha Timor-Leste.
Vise-Primeiru-Ministru, Ministru Koordenadór Asuntu Sosiál, no Ministru Dezenvolvimentu Rurál no Habitasaun Komunitária, Mariano Assanami Sabino, hateten ko’alia kona-ba sistema aihan nian ne’e sei la sees husi produsaun.
“Agora ita-ko’alia kona-ba sistema aihan nian, ita ko’alia kona-ba produsaun. Ita ko’alia kona-ba prosesamentu, ita ko’alia kona-ba transporte. Ita ko’alia kona-ba armazenamentu hahan nian no ita-ko’alia kona-ba tein no hahán sira-ne’ebé ema konsumu. Ita hanoin ona kona-ba iha produsaun ne’ebé di’ak,” Assanami hateten ba jornalista sira iha Kumoro, ohin.
Prezidente Movimentu Jerasaun Nutrisaun (MJN), Arnaldo Moisés, hateten seguransa aihan nu’udar objetivu xave hodi garante nutrisaun umanu iha Timor-Lestee.
“Objetivu husi semináriu ne’e atu hasa’e joven sira-nia koñesimentu kona-ba produsaun aihan no fó kbiit ba sira atu sai mudansa iha sira-nia família no ambiente sosiál hodi hamenus mánutrisaun iha Timor-Leste,” Arnaldo Moisés hateten.
Importante atu hanoin katak Loron Mundiál Nutrisaun kria husi Nasaun Unida iha tinan 1979 no nia objetivu prinsipál maka atu hasa’e konxiénsia kona-ba nesesidade produsaun aihan nian no reforsa nesesidade parseria iha nivel oioin.
“Ida-ne’e mós hakarak atu hasa’e konxiénsia kona-ba problema hamlaha, ki’ak, no mánutrisaun iha mundu. Ida-ne’e mós hakarak hametin kooperasaun ekonómika no téknika entre nasaun sira-ne’ebé sei dezenvolve hela. Ida-ne’e mós hakarak atu promove transferénsia teknolojia nian ba nasaun sira-ne’ebé mak sei dezenvolve hela,” nia dehan.
Iha fatin hanesan, Reprezentante UNICEF iha Timor-Leste, Patrizia DiGiovanni, hateten Loron Mundiál aihan importante duni atu selebra tanba husi aihan mak fó moris ema iha planeta ne’e.
“Bainhira ita-ko’alia kona-ba futuru planeta nian, ita-ko’alia duni kona-ba joven sira Timor-Leste nian, ne’ebé kaer kbiit hodi transforma dalan ne’ebé ita hanoin kona-ba aihan no nutrisaun,” Patrizia DiGiovanni hateten.
Nia subliña, maiória komunidade iha Timor-Leste konsumu aihan ne’ebé ladún iha nutrisaun, no maneira produsaun ne’e ladún sustentável.
Ho nune’e, UNICEF servisu besik ho Governu, parseiru sira no komunidade hodi hametin sistema aihan ne’ebé sensivel ba nutrisaun, sistema sira ne’ebé asegura labarik, adolesente no família hotu-hotu iha asesu ba aihan ne’ebé seguru, baratu no nutritivu kada loron.
Jornalista : Felicidade Ximenes
Editór : Cancio Ximenes
