OEKUSI, 24 Outubru 2025 (TATOLI) – Programa Nasionál Dezenvolvimentu Suku (PNDS) finaliza ona konstrusaun ponte alternativa liga ba semitériu Masakre Tumin, iha suku Bobometo sub-rejiaun Oésilo, Rejiaun Administrativa Espesiál Oekusi Ambeno (RAEOA).
Diretór PNDS Oekusi, João Evaristo Bobo, esplika katak, programa PNDS prioridade ba suku Bobometo iha 2025 ne’e, iha projetu tolu, ne’ebé antes ne’e Konsellu-Suku Bobometo mak propoin rasik, no PNDS fasilita de’it.
“Projetu tolu ne’e ida iha aldeia Oébaha halo kapela, ida iha aldeia Oénoah mós hanesan halo kapela, ponte mak iha semitériu Tumin, agora finaliza ona iha fulan-Setembru 2025, agora hein de’it atu pinta,” nia hateten iha Oekusi, ohin
Notísia relevante:Presiza harii ponte hodi fasilita movimentasaun bá semitériu masakre Bobo-Ufe Tumin
Antes ne’e, Xefe Suku Bobometo, José Labi Caet, rekomenda ba Autoridade RAEOA atu konstrui ponte alternativa ida atu fasilita komunidade sira atu asesu ba semitériu tanba tempu udan difikulta vizitante sira atu asesu ba sunu lilin tanba mota.
“Ha’u pedidu kona-ba sasán neʼebé presiza iha masakre ne’e, liuliu kada tinan atu selebra nia loron akontesimentu iha 8-9 Setembru 1999, bainhira atu hakat tama mai iha semitériu masakre ne’e, iha ponte ki’ik ida iha-ne’ebá maibé aat. Tan ne’e, ha’u husu Prezidente Autoridade atu tau atensaun nune’e bele tama mai ho di’ak,” José Labi Caet dehan.
Notísia relevante:Sobrevivente no mártir Masakre Tumin seidauk simu pensaun
Projetu ne’e ezekuta husu Ekipa Jestaun Suku Bobometo ho totál orsamentu $14,329.54 ho durasaun serbisu fulan haat.
Jornalista: Abílio Elo Nini
Editór: Rafael Ximenes de A. Belo
