OEKUSI, 11 Setembru 2025 (TATOLI) – Prezidente Komisaun Organizadora ba Masakre Bobo-Ufe Tumin, Agostu Poto Obe, rekomenda Konsellu Veteranu Rejiaun Administrativa Espesiál Oekusi Ambeno (RAEOA) atu rekoñese família sobrevivente inklui mártir sira hamutuk na’in-12 mate iha momentu Masakre Tumin, ne’ebé akontese iha loron 08 to’o 09 Setembru 1999, to’o agora seidauk simu pensaun husi Governu.
“Família sobrevivente balun seidauk hetan apoia husi Governu liuliu pensaun nian, ho tulun haraik-aan, ba ita hotu nia serbisu, Prezidente Autoridade RAEOA ho nia estrutura tomak, esforsa atu Estadu rekoñese no valoriza sira, liuliu parte Konsellu Veteranu Oekusi,” nia hateten, iha ámbitu komemorasaun loron Masakre Tumin, tersa ne’e.
Notísia relevante:Hanoin hikas Masakre Tumin: “Goza ukun rasik aan ne’e, keta haluha sira”
Hatan ba rekomendasaun ne’e, reprezentante Konsellu Veteranu Oekusi, husi responsavel Zona Oésilo, Luís de Jesus Neno, rekoñese, maibé husi ekipa verifikasaun husi komisaun omanajen.
“Husi Konsellu Veteranu valoriza ona ema barak, ne’ebé mate ba rai ne’e, balun simu ona no balun seidauk simu. Maibé, iha Masakre Tumin sira-ne’ebé seidauk simu na’in-12, maibé na’in-ida sei hela iha Indonézia no seidauk rejistu, maibé ita iha ne’e na’in-11, rejista ona. Sira-nia família mós hetan verifikasaun ona husi komisaun omenajen, ne’ebé ita hein de’it atu-bele anúnsia atu hetan rekoñesimentu ba sira-ne’ebé sei moris, ne’e importante tebes, atu ita hatene tuir ida-ne’e,” nia hateten.
Notísia relevante:Konsellu Veteranu loke inskrisaun ba kombatente nia oan sira asesu ba bolsa estudu
Iha biban ne’e, sobrevivente Masakre Tumin, José Ulan, nu’udar mate restu Masakre Tumin, informa, antes ne’e konsege simu maibé to’o 2014 mai oin pendente to’o ohin loron.
“Primeiru ha’u-nia naran sai no konsege simu rihun $8000 ba tinan haat nian komesa 2011, depois kada fulan ha’u simu $275,00, to’o 2014 fulan-Fevereiru. Ha’u-nia pensaun ne’e derrepente de’it para no laiha ona. Ha’u konsege ba cek iha Konsellu Veteranu maibé laiha rezultadu to’o ohin loron. Ha’u tenke hili ida, simu PNTL nian ka pensaun ne’e, ne’ebé laiha rezultadu entaun pendente to’o ohin loron,” nia haktuir.
Notísia relevante:INSS-BNCTL abertura pagamentu pensaun sosiál ba benefisiáriu 1.506 iha Nítibe
Entretantu, bazea ba livru 3-C Orsamentu Jerál Estadu (OJE) RAEOA nian, haktuir benefisiáriu ne’ebé hetan ona apoiu osan Estadu iha RAEOA ba kombatente ka veteranu libertasaun nasionál ema na’in-363 no mártir libertasaun nasionál ema na’in-223.
Jornalista: Abílio Elo Nini
Editór: Rafael Ximenes de A. Belo
