OEKUSI, 24 Juñu (TATOLI)– Ekipa husi Institutu Nasionál Seguransa Sosiál (INSS), hamutuk ho Banku Nasionál Komérsiu Timor-Leste (BNCTL), segunda ne’e, abertura pagamentu pensaun sosiál ba ferik, katuas no Ema ho Defisiénsia (EhD) hamutuk na’in-1.506, iha suku lima iha sub-rejiaun Nítibe, Rejiaun Administrativa Espesiál Oekusi Ambeno (RAEOA).
Koordenadór INSS Oekusi, Teotónio Tolan, informa pagamentu pensaun sosiál faze daruak tinan ne’e iha Oekusi hamutuk 7.855, ne’ebé hahú uluk iha sub-rejiaun Nítibe ba aldeia 17 no suku lima, hahú husi suku Bene-Ufe iha, segunda, 23 Juñu no sei remata iha suku Ban-Afi iha loron kuarta 25 Juñu 2025 ne’e, ho oráriu pagamentu hahú husi dadersan, tuku 08:00 sei remata iha kalan tuku 09:00.
Notísia relevante:INSS Oekusi konklui pagamentu ferik-katuas 1.454 iha Nítibe ho susesu
Tuir nia, husi benefisiáriu 1.506 mai husi suku lima mak hanesan, suku Bene-Ufe 269, Suni-Ufe 202, Usitako 353, Lela-Ufe 428 no suku Ban-Afi 254.
“Pagamentu iha Nítibe loron tolu de’it, ba benefisiáriu hamutuk na’in-1.506, ne’ebé ita halo horsehik iha Bene-Ufe, ohin ita kontinua fali ba suku Sun-Ufe inklui kedas suku Lela-Ufe tanba aban kuarta 25 Juñu 2025, ita ensera iha suku Ban-Afi, no kinta ita kontinua fali ba sub-rejiaun Pássabe,” Koordenadór INSS Oekusi, Teotoniu Tolan, ba Ajénsia Tatoli,I.P, ohin.
Nia informa, iha loron kinta 26 to’o 27 Juñu 2025, ekipa kontinua halo pagamentu ba benefisiáriu iha sub-rejiaun Pássabe ba benefisiáriu 962 mai husi suku rua, suku Abani 742 no Malelat 220.
Nune’e mós iha loron 28 Juñu to’o 01 Jullu 2025, ekipa kontinua ba halo pagamentu tan iha sub-rejiaun Oésilo ba benefisiáriu 1.750, mai husi suku tolu, hahú uluk iha suku Usitaqueno ba benefisiáriu 143, kontinua ba suku Bobometo 1.071 no ikus iha Usitasa’e ba benefisiáriu 536.
Pagamentu ikusliu iha sub-rejiaun Pante Makasar hahú iha loron 02 Jullu to’o 10 Jullu 2025 ba benefisiáriu 3.637, husi suku ualu, pagamentu dahuluk iha suku Taiboko ba benefisiáriu 723, Naimeko 493, Bobokase 216, Lalisuk 302, Cunha 589, Costa 872, Lifau 280 no ensera pagamentu
“Valór pensaun sosiál la hanesan sira-ne’ebé idade 60 to’o 69 simu $60 kada fulan, idade 70 to’o 79 simu $80 kada fulan no idade 80 ba leten simu $100 kada fulan, agora ne’e, sira simu fulan tolu, hahú husi Abríl, Maiu no Juñu,” nia hateten.
Nia esplika, maneira pagamentu ne’e balu bele liuhusi Automated Teller Machine (ATM) P24, sira-neʼebé hela iha área rurál seidauk iha konta bankária no ATM konsentra iha sede suku idak-idak, no sira-ne’ebé la’o labele, ekipa sei halo pagamentu movél to’o duni benefisiáriu nia rezidénsia hela fatin.
Notísia relevante:INSS Oekusi rejista reklamante ba subsídiu idozu-invalidés na’in-34
Idozu na’in-haat devolve rihun $2-resin ba Estadu tanba falsifika dokumentu
Jornalista: Abílio Elo Nini
Editór: Florencio Miranda Ximenes
