OEKUSI, 12 Fevereiru 2025 (TATOLI) – Koordenadór Institutu Nasionál Seguransa Sosiál (INSS) Rejiaun Administrativa Espsiál Oekusi Ambeno (RAEOA), Teotónio Tolan, relata iha prosesu pagamentu idozu no invalidés konsege rejista reklamante na’in-34 tanba la konsege simu sira-nia direitu pensaun.
“Durante prosesu pagamentu, ami rejista benefisiáriu na’in-34, ne’ebé sira reklama mai iha INSS Oekusi tanba la konsege simu sira-nia direitu pensaun idozu no invalidés,” Teotónio Tolan dehan ba Ajénsia Tatoli iha Oekusi, ohin.
Notísia relevante:Autoridade RAEOA-INSS ensera pagamentu idozu no invalidés
Husi reklamante 34 ne’e ho nia tipu probelma lahanesan, dahuluk balun númeru konta bankaria la hanesan, ka’er númeru konta bankaria seluk no iha sistema hatete fali númeru seluk.
Daruak, benefisiáriu balun osan la tama ba konta bankaria husi faze dahuluk to’o faze dahaat, balun simu de’it to’o faze daruak no balun simu de’it faze dahuluk iha 2024 nian tanba iha sistema mak la ativu
“Ami sei hato’o fali relatóriu ne’e ba iha nasionál atu ativa fali sira-nia prosesu pagamentu tanba problema la-ativu ne’e iha benefisiáriu na’in-sia kedas, sira seluk problema iha konta bankaria la hanesan, ne’ebé ami rejista ona iha ami-nia lista relatóriu atu hato’o ba nasionál, nune’e bele rezolve iha pagamentu oin-mai,” nia afirma.
Maske benenefisiáriu na’in-34 ne’e la konsege simu pensaun, maibé ho maneira komunikasaun di’ak, parte INSS koopera hodi halo esplikasaun ba benefisiáriu atu intende kona-ba lala’ok prosesu pagamentu nian.
Entretantu, totál benefisiáriu ba pensaun sosiál iha Oekusi hamutuk 7.055. komposta husi sub-rejiaun Pássabe 927, sub-rejiaun Nítibe 1.454, sub-rejiaun Oésilo 1.681 no sub-rejiaun Pante Makasar 2.993.
Notísia relevante:INSS no BNCTL paga pensaun sosiál ba idozu no invalidés na’in-744 iha RAEOA
Jornalista: Abílio Elo Nini
Editór: Florencio Miranda Ximenes
